Boekbekendstelling: SA Skrywers - Kontreistories - 29 Verhale deur verskillend skrywers #Afrikaans

Sinopsis:

Op elke kontrei dorpie is die een of ander bewaarde geheim, staaltjie te vertelle of sommer net ʼn storie wat elke nuweling op die dorp móét hoor. In SA Skrywers se Kontreibundel word jy weggevoer na die lewe van klein Hansie en jy ervaar ʼn begrafnis op Loopspruit. Hierdie bundel se stories beloof om jou volgende keer twee keer te laat dink voordat jy sê: dit is net ʼn scrapyard of dis net ʼn stukkende windpomp.

Durf die reis aan saam met elk van die skrywers en word deel van die lewe in SA Skrywers Kontreibundel se unieke wêreld.

Bestellings kan geplaas word by enige van die skrywers teen R130.00, posgeld uitgesluit.

Sal eersdaag op Groep 7 se Webwerf beskikbaar wees

S​krywers:​

1. Moles voor die Keffie - Babsie Jacobs

2. Wys my ‘n bittersoet wals – Maritza du Preez

3. Hansie se verrassing - Elsabe de Beer

4. Die einde of die begin? - Ilze Beukes

5. Broederlike weddenskap - Lia Killian

6. Soetwals op Bitterfontein- Rosalee Meyer

7. Begrafnis op Sukkelfontein - Ria Fourie

8. Diamante is rooi - Werner Wehmeyr

9. Vrome vriendskap - Hannes Snyman

10. Aronskelk – Ben le Roux

11. Ver pad na verligting - Driekie Grobler

12. Stukkende Windpomp - Lia Killian

13. Salt and Pepper 'n Liefdestorie. Lynelle Clark

14. Scrapyard storie - Antoinette Lourens

15. Baasspeurder Jorsie - Rosalee Meyer

16. Die Spruit, die Lyk, die Boepens.-Hansie Lategan

17. Drie Remora Suigvisse en ń dominee - Antoinette Venter

18. Liefde is ń lang woord – Maritza du Preez

19. Basjan se geheim - Rosalee Meyer

20. Wals op Bitterfontein - Johan Jansen

21. Roomys agter op ń bakkie - Johan Jansen

22. Drukking van die siel - Tarina Jordaan

23. Bekerveld Scrapyard - Pieter van Loggerenberg

24. Skandvlek - Riana le Roux

25. Droogte op die plaas. – Jeannetta Swanepoel.

26. Die huis op Kleinhoop – Marika Giani.

27. DIE HEK – Simon Riekert.

28. Die man met die Swart Skoene – Frans an Aardt.

29. Die Scrapyard op Calvinia - Piet Saayman

Ontmoet die skrywers:

Ria Fourie

Ek is 59 jaar oud, ma van vele en ouma van nog meer. Getroud en woonagtig in Pretoria. Werk my hele lewe nog en was vir een jaar by die huis maar ek het weer begin werk na ek besef het ek kan nog nie die elke dag huis bly ding doen nie. In daardie jaar het ek betrokke geraak by Rainbow Gospel Radio. Vreemd genoeg het ek in Driekie Grobler se voetspore gevolg want sy het voor my gedigte op RGR uitgesaai. Ek het so by SA digters betrokke geraak. Ek skryf al baie jare nie meer gedigte nie. Ek het besef dat my gedigte net vloei as ek gelukkig is. Ek het my hand begin waag aan stories skryf en alhoewel ek nog baie ver van ’n ware skryfster is, is dit vir my lekker om net stories neer te pen. My droom is om ’n skryfskool te kan doen en dan hoop ek om ’n boek te skryf voor ek nie meer kan nie. Ek het een sus en ons twee is baie geheg aanmekaar. Ek het in 2014/15 borskanker gekry maar is tans in remissie. Daarby is ek dol oor katte, maar het die afgelope sewentien jaar nie daai voorreg gehad om een te hê nie. Ek help tussendeur my man om Chinese kontrakwerkers te vervoer en ek besef dat hieruit ook nog ’n storie kan kom, alhoewel dit baie van my tyd vat en my fisies dreineer. Verder werk ek by ’n wonderlike oudioloog en ons twee het baie pret saam. Ek is baie lief vir die Here, al verstaan ek Hom glad nie. Daarom moet ek elke dag die besluit maak om Hom onvoorwaardelik te glo. Partydae is dit makliker as ander dae.

Hannes Snyman 

As oud Transvaler was dit ʼn moeilike besluit om die ooptes van die Karoo aan te durf, maar op die einde het hierdie pragtige Karoodorp, Orania, nesgeskrop in die holte van my hart. Met kinders wat reeds hulle eie dinge begin doen het, is daar nou minsame tye wat ek en vroulief die sterreprag, wat jy net in die Karoo in soveel glorie kan aanskou, kan indrink terwyl ʼn soel windjie die versengende somer hitte afkoel en ʼn Hemelse atmosfeer skep.Dit is ook hier waar ek die pen vir die eerste keer doelgerig opgetel, en besluit het om my hart aan andere oor te dra.

Antoinette Lourens

Ek moes 'n baie suksesvolle loopbaan vaarwel roep toe my man in 2014 met pensioen gaan en aankondig ons verhuis see toe. Na 32 jaar ononderbroke diens in die Suid-Afrikaanse Polisiediens. Ekself was te jonk vir pensioen en het nie kans gesien om 160 km per dag te pendel tussen Aston Baai en Port Elizabeth waar hul wel 'n pos sou hê vir 'n luitenant-kolonel nie. Boeke was nog altyd 'n groot passie vir my, en omdat ek baie mentor rolle vertolk het in die polisie het ek besluit om 'n boek aan te pak, gedurende 2015, waarin ek van my kennis kan oordra aan die jeug. Die boek is nog nie voltooi nie. (Die mikpunt tans is 2018). Lynelle Clark, het my genooi, iewers gedurende 2017, om deel te neem aan SA Skrywers se uitdagings, en ek skryf dus die afgelope jaar ook in Afrikaans. Ek praat baie en daarom dink ek is kommunikasie die medium waarin ek myself kan uitleef. My geloof, die see, en natuur lewe, is my kreatiewe bronne. Ek is nog 'n groentjie en skryf is tans 'n lekker stokperdjie, en tydverdryf.

Piet Saayman

Ek is 'n oud Vaaldriehoeker en het in 2009, na my aftrede Pretoria toe verhuis. My liefde vir lees en skryf het al op laerskool begin.

In 2008 begin ek ' n boek skryf wat deur die keurders van 'n drukkery verwerp word. Ek het gou besef mens het leiding nodig en het Janie Oosthuizen se skrywerskursus gevolg.

Na 2 kortverhale in Vrouekeur was ek reg vir die ding. Ek het kortverhale geskryf vir die vale en dit op my rekenaar gebere.

Nadat ek by SASkrywers en Malherbe uitgewers se FB aangesluit het, is die deure vir my oopgemaak en is dit die perfekte platform vir ons aspirant skrywers. Ek skryf omdat ek dit geniet en is opgewonde oor my 1ste kinderboek wat pas verskyn het. Ek is tans besig met nog 2 boeke. 

Lynelle Clark

As 'late-bloomer' het Lynelle ernstig begin skryf in 2010 toe sy baie tyd op hande gehad het. In 2012 het haar eerste boek, A Pirate's Wife, die lig gesien. In 2014 het Bella's Choice verskyn. Albei die boeke is op Amazon beskikbaar. Haar tog het haar op verskillende paaie gelei en so het sy baie aspekte van die skryfkuns geleer. Haar derde boek, Blood Mines, sal vroeg volgende jaar vrysgestel word. Sy hou van diversiteit in haar skrywery en is altyd opsoek na 'n nuwe uitdaging en een van haar stories is so pas vir 'n Aardklop uitdaging in aanmerking geneem. Afgesien daarvan het sy ook 3 Blogs wat haar aandag en tyd verg waar sy nie net haar eie werke bemark nie maar ook mede-skrywers sin. Sy het 'n passie om nuwe skrywers te identifiseer en te help om ook hul skryf drome waar te maak en is voltyds betrokke by SA Skrywers en Digters. 

    

Antoinette Venter

Antoinette woon in die lieflike Jeffreysbaai omgewing saam met haar man, ouma, skoonma, vier honde en twee katte. Haar liefde vir lees kom reeds van jongs af aan. Verskeie tydskrifverhale het gevolg. 'Soos die blou roos blom’ bonus-kortverhaal in een van die Romanzaliefde e-boeke van Lapa Uitgewers en ‘Offerliefde’ in die Hartlam bundel (Tafelberg) Daar is ook verskeie publikasies in saamgestelde bundels deur kleiner uitgewers.

Ilze Beukes Ek bly in Kroonstad in die Vrystaat, is getroud en  het twee getroude dogters, en een seun wat nog swot. Ek is ook 'n ouma vir vier woelwaters. Bedags werk ek by 'n plaaslike laerskool en saans verdwaal ek in 'n wêreld van storieskryf. 

Jeannetta Swanepoel 

Ek woon in 'n klein dorpie in die Noord-Kaap, Ritchie. 'n Plekkie wat ryk is aan geskiedenis, soos Die slag van Magersfontein en Die slag van Modderrivier, uit die dae van die Anglo-Boereoorlog, wat enkele kilometers van ons geleë is. Ek is 'n sjef, kulkunstenaar en Dj, maar my groot liefde lê natuurlik in die kunste. Ek skilder en skryf, nie omdat ek dit gekies het nie, maar eerder omdat die karakters en die verfkwaste my gekies het. Ek is ʼn stil en diep mens wat my woorde en gedagtes met ander mense deel d.m.v. my skryfwerk. Daar is ʼn wêreld van fiksie en karakters binne my wat eenvoudig met lesers móét gedeel word.

Rosalee Meyer

Woorde is vir my so nodig soos my volgende asemteug. Woorde is my vreugde, my skuiling. Die goue draad wat my lewe omraam. My woorde vloei voort uit Genade en Seën. Mag ek deur my woorde ook die voorreg hê om 'n seën vir ander te wees. Mag my woorde my lesers meevoer op 'n betowerende reis. 'n Groot dankie aan SA Skrywers vir die voorreg en die geleentheid. Bowenal 'n dankie aan my Hemelse Vader wat my vir nou hiermee seën. Ek is diep dankbaar dat ek nou 'n flertsie van my droom bewaarheid mag sien.

Lia Kilian 

Lia is gebore in Witbank (1968) en groot geword in Vanderbijlpark. Haar lewensbane het haar deur ons land gevat en haar die voorreg gegee om elke provinsie te leer ken en lief te kry. Sy het reeds as jong meisie begin skryf, maar eers in 2005 haar eerste publikasie gedoen. Sy het reeds al tien publikasies onder haar regte naam en 4 onder haar alias. Sy stel 'n Dig en foto bundel bekend in Desember asook haar eerste kortverhaal bundel. Februarie 2018 verskyn daar twee van haar kortverhale in 'n kortverhaalbundel asook twee gedigte in 'n digbundel wat deur SA Skrywers en Digters uitgegee word. Nog 'n kortverhaal bundel en Digbundel kom in Maart 2018 uit asook 'n roman wat die eerste een is van 'n reeks. Sy doen ook vertaal werk en sketse vir kinderverhale.

Marika Swart Giani 

Ek is n mamma van 4 en bly in Springs. Ek het van Laerskool dae af gedigte geskryf en dit was 1 van my grootste drome om 'n skrywer te word. Ek hou daarvan om liefdesverhale te skryf want die liefde is vir my baie spesiaal asook enige storie met 'n gelukkige einde. Ek is 'n 'sucker' vir gelukkige eindes.

Hansie Lategaan 

Ek is jare lank in die IT bedryf, maar het altyd vir my plesier en die asblik gekryf tot ek SA Skrywers ontdek het.  Ek woon en werk in Centurion waar ek bedags my brood verdien, maar saans my verbeelding op loop laat gaan en iets skryf.  Skryf is vir my ‘n absolute plesier en ek skryf wanneer ek wil en nooit omdat ek moet nie.  Dit is vir my waaroor dit gaan.  Ek doen dit omdat ek daarvoor lief is. 

Pieter van Loggerenberg

Groot Marico is Bosman wêreld soos hulle sê dit is in die hartjie van die Wes Transvaal en is baie ryk aan die nostalgie van die outyd en dis waar ek woon op 'n plaas al vir 24 jaar. As kind was ek lief vir stories nog voor ek hulle self kon lees of skryf en op skool het dig kuns my verbeelding aan gegryp, maar nooit sou ek kon dink eendag sal ek self 'n skrywer en digter word nie. Ek is 'n stil eenkant mens wat hou van moordsake oplos en navorsing doen op ou sake. Ek is 'n romantikus en is nou maar net eenmaal verlief op verlief wees en happy endings, sou ek 'n liefdesverhaal skryf. Ek is ook 'n goeie potloot skilder as ek die dag lus is vir teken en ek hou van kos maak ek is mal oor musiek wat iets in my binneste aan wakker en is lief vir die natuur. Ek is op my gelukkigste met 'n goeie boek as die wolke toe trek en dit beginne reën of as die mis oor die berge trek en die plaas spookagtig beginne lyk en als net stil om my raak.

Driekie Grobler

Ek is 'n skrywer/digter/motiveringspreker/omroeper/proefleser/redigeerder. Woon in Pretoria en my passie in die lewe is om ander te help en Afrikaans te bevorder. Ek is betrokke by verskeie organisasies soos o.a. die GHA (Die Genootskap vir die Handhawing van Afrikaans) en is ook ‘n Ambassadeur by Afrikaans.com. Het al verskeie boeke gepubliseer en heelwat toekennings vir skryf-/en digkuns ontvang. My doel is om ‘n verskil te maak en waarde toe te voeg hoe en waar ek kan.

Tarina Jordaan

Tarina Jordaan is 'n onafhanklike navorser en skrywer. Alhoewel haar skryfwerk tot onlangs toegespits was op akademiese publikasies rondom sin van plek (genius loci) en plekgehegtheid, put sy deesdae meer pret uit die skryf van kortverhale vir die Vrouekeur. Haar nuutste projekte sluit in twee Afrikaanse spanningsromans. Sy woon tans in Antwerpen, België

Elsabe de Beer 

Ek was my lewe lank ‘n onderwyseres, het onlangs skryfkursusse by Skryfgeheime en SA Vryskutskrywers gedoen, en daarna het die gogga my gebyt. Ek het nou al twee kortverhaalbundels gepubliseer, en hoop om nog baie meer te publiseer!

Simon Riekert

Ek is 'n verplante Laevelder uit die Sabie-vallei en woon die afgelope drie dekades in Pretoria. Danksy gelukkige kinderjare, goeie onderwysers en geduldige ouers het my liefde vir lees en skryf nooit opgehou nie. My inspirasie het van vroeg tyd af gekom van ooms wat grootoog kon vertel langs die kampvuur, ons huisdokter wat poësie geskryf het en 'n tante wat saam met die spookstories in die distrik gespook het. Nou reis ek en my vrou die land vol met bergfietse wat ons geleentheid bied om by die plekke uit te kom waar interessante mense met goeie stories leef. Ek hou van sport, musiek, mense, fotografie en fyn kuns. Ek skryf stories en poësie oor die lewe, mense se dinge en die dinge van die lewe. Tussendeur pleeg ek regsadvies in 'n vennootskapspraktyk en geniet my lewe as geakkrediteerde rugbyjoernalis. Of al my stories waar is, bly 'n goedbewaarde geheim. Nie eens 'n goeie stukkie biltong breek die stilswye nie. Maar 'n mens weet nooit...

Frans van Aardt 

Ek is lief vir die natuur. Kom goed met mense oor die weg, maar baie gelukkig alleen in die veld. Baie lief vir lees van jongs af. Die skrywery het vir my genesing gebring na 'n baie traumatiese tydperk Ek is mal oor ingelegde druiwe, verkieslik die rooies. My tipe boeke wat ek skryf word grootliks daardeur bepaal.

1 Glasie = spanning

2 Glasies = riller

3 Glasies = romanse

4 Glasies = wetenskap fiksie

Nou ja, hierbo het julle gesien dat ek ook van grappies hou!

Johan Jansen

Vandat ek kan onthou, het ek ñ groot verbeelding gehad en altyd stories opgemaak. Skryf was nog altyd my passie en my vriendin het my geraai om te skryf. Op die oomblik is ek besig om ñ verhoogstuk vir Aardklop te verwerk vir die wenner (Lynelle Clark) wat aan ñ SA Skrywer kompetisie deelgeneem het.

Werner Wehmeyr

Ek bly tans in ʼn dorp oorkant Edinburgh in Skotland. En daar is ʼn groot stuk see tussen my en die hoofstad. Ek is gebore in Pretoria en dit is waar my liefde maar nog lê al het die kaap my tweede blyplek geword omdat my pa nou daar bly. Ek het nooit besef skryf sou ʼn groot deel word van my lewe nie maar in 2010 het ek gedigte begin skryf wat ek op die webblad Woes geplaas het. Dit was vir my ʼn ongelooflike ervaring want vir die eerste keer het ek besef dat ek hier ʼn talent het want ek nooit geweet het bestaan nie.

Ek was ʼn analis programmeerder gewees tot die tegnologie so verander het dat ek ook my beroep moes aanpas en werk tans as ʼn boekhouer in Edinburgh. Ek is ʼn baie diep mens wat op ʼn ander vlak oor dinge dink en redeneer. Ek het nou onlangs begin om selfs kortverhale te skryf en doen tans ʼn skryf kursus.

Ek is meer bekend as ʼn romantikus via my gedigte en stories maar ek probeer om so wyd moontlik te skryf. Ek het reeds ʼn gedeelte bundel uitgebring met stories en gedigte maar binnekort kom my eerste solo digbundel uit wat ek as prys gewen het. 

Babsie Jacobs

Gebore op Jacobsdal, skool gegaan op Hoopstad, grootmens geword op Douglas en nou besig om oud te word op Harrismith – dis Babsie Jacobs. Ek ‘n enkelouer met kluisenaarneigings en as dit nie vir die stemme in my kop was nie, sou my lewe baie vervelig gewees het!

In 2007 was ek 'n finalis in NB Uitgewers en Leserskring se liefdesverhaalwedstryd vir nuwe skrywers. My inskrywing, Volbloedvrou vir 'n Vaalseun, is gepubliseer onder die skuilnaam Kobie Smit en dit bly nog steeds vir my ‘n wonderwerk! Dit was ook ‘n groot verrassing toe dit in September 2017 opgeneem is in NB Uitgewers se Melodie Omnibus 2.

Na tien jaar het die skryfgogga my weer gebyt en my eerste kortverhaal het onlangs in Die Huisgenoot verskyn.  

Wanneer ek nie werk om die pot aan die kook te hou nie, reis ek die wêreld vol, red renosters, vang misdadigers en verlei sexy mans. Alles in my verbeelding, natuurlik.

Naaswenner van die Eiebundel kompetisie: Melinda du Plessis: Metamorfose.

Baie geluk met die vrystelling van jou nuwe boek, Metamorfose

Baie mense weet nie altyd hoeveel tyd in ‘n boekvrystelling gaan nie en ek is seker jy kan boeke skryf net oor die proses. Jy is ook nou betrokke by SA Skrywers en was naas wenner van die SA Skrywers eie bundel kompetisie. Baie dankie dat jy tyd gemaak het vir hierdie onderhoud en ‘n kykie in jou lewe. Baie geluk met hierdie vrystelling. 

1. Hoe het die idee van die bundel ontstaan? 

Dit was totaal onbepland en onverwags. Ek was besig om aan die digbundel vir die eie bundel kompetisie te skryf toe ek n klompie 'writing prompts' na Afrikaans vertaal het. Die een vertaling was ''n uitgedopte hart'. Die prentjie wat ek gekry het was van hierdie meisie wat deur n galery gestap het waar elke kunswerk uitbeeld hoe hierdie kunstenares bespot en seergemaak is in die dorp omdat sy kreupel was en so meer. Almal het gedink sy is n boemelaar. Toe ek die gedig begin skryf het die storie duideliker en duideliker geword en ek het besluit dit sal eerder een van die kortverhale in die eie bundel kompetisie wees. Ek het vir albei kompetisies ingeskryf. Een storie word toe twee en die word toe vyftien stories wat strek oor tien jaar in die meisie se lewe. Soos ek sê, totaal onbepland.

2. Ek hou van die titel van die boek wat het jou laat dink daaraan?

My naam vir die boek was Die legkaart van Anna se lewe... maar toe dit by die drukproses kom het hulle gesê die titel moet verkieslik nie langer as vier woorde wees nie... Ek en vriende het gewonder en met seker twintig titels gesit. Een van my bejaarde Voete Bederf kliënte het gevra waaroor die boek gaan en sy het met Metamorfose vorendag gekom. Dit beskryf die boek uitstekend in een woord.

3. Mense besef nie altyd hoeveel tyd of selfs van jou eie ondervinding gaan in so ‘n boek nie. Is daar ‘n spesifieke staaltjie wat jy ons kan vertel wat die boek lewendig gemaak het?

Jong, hierdie hele jaar is 'n staaltjie wat skryf aan betref. Ek het maar êrens in die begin van die jaar my eerste kortverhaal geskryf vir 'n uitdaging op SA Skrywers en toe geskok in trane gesit toe ek dit wen... die eerste storie in Metamorfose was my tweede kortverhaal. Daar was geen beplanning nie, ek het net geskryf wat ek voor my gesien gebeur het, en simpel maar waar my oë uitgehuil en geskater van die lag saam met die karakters. Met die laaste storie was ek 'n hele dag tranerig voor ek dit geskryf kon kry. 

4. Hoe lank het die skryfproses gevat?

'n Maand in die nagte tussen 22h00 en 2h00 en oor naweke soos ek tyd gehad het.

5. Jy was die naaswenner van die SA Skrywers bundel kompetisie, hoe het dit jou laat voel toe jy die aankondiging hoor?

Ek was die naaswenner ja... dit voel steeds onwerklik al sit ek met die boek in my hand met my naam daarop. Ek was uit die oggend en toe ek by my foon kom sien ek my vriendin het my al n paar maal gesoek, sy het toe op die facebook blad gesien dat ek een van die wenners was. Ek het in trane uitgebars dat die water spat. Ek het so 'n dankbare hart, het nooit gedink God gaan my my droom so vinnig gee nie.

6. Het jy jou familie en vriende se volle ondersteuning of weet hulle niks?

My suster is my grootste ondersteuner, sy is glad nie n leser nie maar het elke storie getrou gelees soos hul gevorm het en pittige terugvoer gegee. Ek dink die res van my familie kan saam met my nie glo dat dit werklik gebeur nie. My vriende is engele om my.

7. Waar het skryf vir jou begin?

Hierdie jaar, 2017. Ek het vroeg in die jaar vir die Here gevra wat my groot uitdaging vir die jaar is... vandat ek 40 is het ek besluit om groot goed - vir my - aan te pak wat ek nog altyd gedink het ek nooit sal kan doen nie. 2014 was Kilimanjaro, 2016 die 800km Camino in Spanje. 

My aksiewoord hierdie jaar was skryf. In mý kop was dit om te dig... vanaf 2008 het ek n paar gedigte geskryf. Ek het dus by n digslypskool aangesluit en myself daarin ontwikkel. Twee van my gedigte is toe opgeneem in Hartswoorde, SA Digters se eerste digbundel wat in Julie bekendgestel is. Intussen het ek my eerste kortverhaal geskryf en die uitdaging daarmee gewen. Ek lees toe raak dat daar n groot kompetisie gehou gaan word op beide die dig en skryf blaaie. Ek kom toe in as een van die twintig mense op beide. Totaal mal ek weet... maar ek het besluit om deur te druk. Ek word moeg as ek terug dink daaraan. Ek het Julie geneem om my digbundel te skryf - ek het net 24 van die 76 reeds gehad; en Augustus om Metamorfose se vyftien stories te skryf.

8. Wat is die mooiste terugvoer wat jy al ontvang het?

My Sus, Ritha Lubbe,  se terugvoer, sy is eerlik en reguit en pittig. Dit beteken baie dat sy dit lees al hou sy niks van lees nie... ook dat sy saam lag en huil. Maar natuurlik is dit lekker om van mense wat ek nie ken nie te hoor dat hul my stories geniet en daarmee kan identifiseer. Een dame het gesê sy het agt ure geneem om te herstel na sy Metamorfose gelees het en nou wil sy dit weer lees.

9. Daar is tye wat ‘n mens twyfel oor jou eie skryf vermoë, daar is ook tye wat kritiek jou teen die aarde kan gooi en jy dink nee wat ek sien nie kans hiervoor nie. Watter raad het jou tweemaal laat dink oor jou skryfloopbaan? 

Griet, ek het nog nie n loopbaan nie. Al raad wat ek kan gee is om eerlik uit jou hart te skryf, wees eg sodat jou leser kan identifiseer. Fantasie is een ding en het sy plek, maar die boeke wat al jare op my rak staan en wat ek weer en weer lees is die wat my hart diepgeraak het, waaruit ek iets geleer het, wat my laat dink het.

10. Wat is jou raad vir aspirant skrywers?

Sjoe, dis n moeilike vraag want daar is baie antwoorde vir ons - ja ek is steeds een - op daardie vraag. My antwoord: Gaan sit by jou Skepper se voete en vra Hom wat Hy wil hê jy moet skryf, wie is jy as skrywer, wat wil jy sê? Wees getrou aan wie jy is. Sit jou boude op die stoel en begin haha!!! Dit was die absoluut moeilikste vir my!

11. Wat sal jy nog als wil skryf en wat is in die pyplyn?

As ek eerlik moet wees kan ek jou nie antwoord nie, my lewe is baie besig en ek weet nie wat God met hierdie skryfding wil doen nie. Ek los dit by Hom om my vry te maak om die tyd te hê om Sy stories in my uit te skryf. Ek het by die sewe maande SA Skrywers slypskool aangesluit en ons moet n 55000 woorde roman skryf in daardie tyd. Gedagtes begin woel in my rondom die storie. Ons, ek inkluis, sal moet wag en kyk wat gebeur. 

My digbundel, Woordsketse, behoort volgende week gedruk te wees - alhoewel ek nie met hom gewen het nie, het ek besluit om hom tog te laat druk. Dis n groot stuk van my ek-wees en die pad wat ek tot hier gestap het, wat op papier in n paar woorde vasgevang is.

12. Wat staan jou die meeste aan in skryf?

Om die karakters te leer ken, hul emosies te ervaar en saam met hulle te lag en huil.

13. Wie is jou gunsteling skrywer en hoekom?

     

Sjoe, ek lees wyd, maar meestal fiksie. Ek het nie net een gunsteling skrywer nie. Ek lief Wilna Adriaanse,  Annelie Botes, Dee Henderson, Sophia Kapp, Jodi Picoult, Karen Kingsbury, Nicolas Sparks, Lee Child, Irma Joubert, Frank Peretti, Marzanne Le Roux Van Der Boon... hulle karakters word familie, praat met my hart, leer my van die lewe.

14. Waar het jy geleer oor skryf?

In boeke, deur te lees lees lees

Persoonlike vragies:

15.  Het jy enige ander belangstelling behalwe skryf?

       Lees, stap, reis, mense se stories fassineer my

16. Is jy ‘n soettand?

      Beslis daarom sal ek nooit dun wees nie hahaha.

17. Gunsteling gereg?

      Mieliepap met tamatiesmoor en braaivleis

18. Reis jy graag en waarheen?

Ek lief reis en was bevoorreg om al redelik baie te kon sien. Ek hou van Europa en Afrika... enige plek waar daar genoeg natuur ook is om weg te breek, bv. die parke in Londen was my gunsteling deel van die stad. Ek geniet dit om net te sit en luister en kyk na ander se lewens wat om my vloei.

19. Hoe kan mense jou kontak vir hul eie kopie van jou boek? melindaduplessis18@gmail.com is die gerieflikste.

20. Volg link: Facebook https://www.facebook.com/melinda.plessis.3

Baie dankie vir die geleentheid!

Metamorfose – Resensie

Dit was met groot opgewondenheid en afwagting waarmee ek die eerste kopie van Metamorfose ontvang het om te lees. Van die voorblad tot die laaste sin was ek vasgevang en kon die boek nie neersit totdat ek dit deurgelees het nie.

Metamorfose handel oor die lewe van die hoofkarakter, Anna, wat op 27-jarige ouderdom weer terugkeer na haar grootword dorp. Sy is swanger en sonder werk of woonplek. Hier moet sy vir haar en haar ongebore kind ‘n holte vir haar voet vind en ‘n lewe begin met weinig wat in haar guns tel. Boonop word sy konstant met haar verlede gekonfronteer en raak dit elke keer ‘n rou senuwee aan sodat sy amper haar en haar baba se lewe verloor. Maar Anna oorleef en laat haar nie onderkry deur die moeilikste omstandighede nie en is allermins ‘n slagoffer, al kon sy maklik daardie roete neem en haarself bejammer. In die proses ontdek sy wie sy eintlik is, letterlik en figuurlik. Wie haar biologiese ma is en nog vele meer wat verswyg was vir haar al die jare. Al is dit baie diep emosionele en traumatiese onthullings wip sy elke keer weer terug – sterker as tevore en stukkie vir stukkie word sy ‘n heel mens. En tussen dit alles deur behou sy nog die humor, wat dwarsdeur die boek loop soos ‘n goue draad. Soos wat sy heel raak begin sy ook ander se lewens verryk. Boonop is elke nuwe hoofstuk propvol nuwe verrassings. Die karakters se ontwikkeling en ontluiking vind deurgaans plaas en daar is letterlik nie een vervelige oomblik nie. 

Metamorfose is fiksie, maar geensins vlak nie, inteendeel dit spreek van eg medemenslike lewenservaring. Dit is beslis ‘n moet-lees-boek vir die komende vakansie asook ‘n goeie geskenk. Jy sal nie spyt wees nie!

Vierde plek wen storie: Ek is Marieta deur Lynelle Clark

Marieta kyk na haarself in die lang spieël. Die nuwe snyerspak pas haar perfek. Die potloodromp omhels haar heupe stylvol. Die wit sybloes wys net genoeg sodat sy saaklik maar tog vroulik voorkom. Die baadjie skep die indruk dat sy in beheer is. Haar gemaklike swart skoene blink gevryf. Haar grimmering is foutloos aangewend en haar kort kapsel is vroegoggend al deur Heloise gedoen, dit omraam haar gesig pragtig. Die geheel prentjie lyk versorg en afgerond. Presies soos wat sy dit wou gehad het.

“Ek is ‘n wenner.” Herhaal sy haar daaglikse mantra.

“Niks staan in my pad nie.”

“Ek besit die vermoë om suksesvol te wees.”

“My toekoms is nou. My drome manifesteer vandag. Ek is die beste bate vir Greeff, Van Ryhn en Hoekstra Prokureurs.” Tevrede streel sy oor haar klere. Die dae van hartseer is verby. Weg is die versukkelde vrou wat altyd in haar man se skadu moes bly. Sy het verander in ‘n pragtige vlinder.

“Binnekort sal jou naam ook op die bord verskyn: Greeff, Van Ryhn, Hoekstra en Mulder Prokureurs.” Sy kan al die naamplaat sien en sy glimlag vir haar eie beeld. Sy besef dit kan ‘n geruime tyd wees voor dit realiseer maar sy kan nou al droom.  Op daardie oomblik dring ‘n sonstraal die kamer binne en dit voel asof sy op ‘n verhoog staan met die hoofligte op haar gefokus. Sy straal.

“Jy is dinamies, Marieta Mulder.” Verspot gee sy ‘n kniebuiging aan haarself en lag vrolik. Sy kyk dan na die horlosie teen die muur en besef dat dit tyd is om te gaan. Sy tel haar swart leer-aktetas op – ‘n geskenk van haar ouers toe sy die toelatingseksamen tot die Balie geslaag het - maak seker sy het alles en stap by die voordeur uit. Met ‘n defnitiewe klik sluit die deur agter haar. Vir Marieta is dit die mooiste klank. Die deur simboliseer haar onafhanklikheid asook haar nuwe lewe. Sy het al die negatiewe gebeuretenisse agter gelaat en bewys sy kan dit doen. Sy moes baie brûe oorbrug om tot hier te kom. Die feit dat sy op pad is na die grootste Prokureurs firma vir haar laaste onderhoud is ‘n groot oorwinning. Sy het gedroom van hierdie dag vandat sy 18 jaar oud was. Dit het haar 30 jaar gevat, maar sy het dit gemaak. Sy is op die regte plek.

Marieta stap na haar geparkeerde motor onder die afdak in die kompleks, een van die gegoede buurte in Pretoria. Met ‘n vinnige druk van die knoppie ontsluit sy die kattebak en plaas haar aktetas binne en druk die bak toe. Elke stap vat haar nader na haar toekoms en opgewondenheid bruis deur haar. Sy voel lig en vry en sy glimlag vir haar weerkaatsing in die motorvenster.

‘n Vinnige kyk na agter ry sy agteruit. Vir oulaas kyk sy na haar beeld in die truspieëltjie. Die vrou wat terug kyk is professioneel. Elke haar op sy plek. Met ‘n rustige verandering van ratte volg sy die geplaveide pad na die hoofhek toe. Sy word vriendelik gegroet deur die dag sekuriteit en trek haar kaart deur die kontrole paneel. Die hek swaai geruisloos oop en sy ry stadig vorentoe. By die ingang stop sy en wag vir ‘n geleentheid om by die verkeer aan te sluit. Die oomblik wat dit skoon genoeg is sluit sy aan by die oggend verkeer en volg die padgebruikers op ‘n veilige afstand.  Terwyl Marieta ry herhaal sy die motiverende woorde tot by die kantoorgebou in die middestad. Sy was nog nooit so goed voorbereid vir ‘n onderhoud soos op daardie oomblik nie. Alles het net reg gevoel.  

By die moderne toonbank, ‘n groot bos blomme het die plek opgekikker, meld sy aan en na ‘n vinnige gesprek met die ontvangsdame volg sy die sekretaresse na die raadsaal waar die vennote vir haar wag.

“Mev. Mulder, welkom terug.” Groet die jongste van die drie vennote haar. Ferm neem hulle hande en groet mekaar soos ou kennisse: “Asseblief noem my Marieta.” Die ander twee mans groet haar ook vriendelik en ‘n paar konvensionele vrae word gevra wat haar dadelik op haar gemak stel. Koppies koffie word onmiddelik voor hulle neergesit en die sekretaresse trek die deur agter haar toe. Die onderhoud was amptelik aan die gang en elke prokureur het vertel wat hy verwag van die nuwe junior prokureur. Doktor Greeff, die oudste van die drie, het haar ingelig oor die visie van die maatskappy. Marieta het aandagtig geluister en elke vraag flink beantwoord. Daarna word haar vergoedingspakket bespreek. Haar oë rek met die aanbod en sy glimlag tevrede. ‘n Geleentheid word ook aan haar gegee om vrae te vra en om die beurt beantwoord die mans haar. Die uur was sommer vinnig verby. Hoekstra was die eerste prokureur wat homself verskoon het omdat hy binnekort in die hof moes verskyn.

“Wel Marieta, sien jy kans om saam met die klomp te werk?” vra Greeff minder formeel en sy lag gemaklik; bly dat die onderhoud tot ‘n einde gekom het.

“Defnitief Mnr Greeff. Dit sal vir my ‘n groot eer wees om saam met u en die span te werk.” Alhoewel hulle genoem het dat sy hulle op hul name kan noem het sy tog gevoel dat dit heeltemal onvanpas sal wees en het gebly by die formele aanspreekvorm.

“In daardie geval sien ons jou môreoggend.” Marieta se hart spring in haar keel. Het sy reg gehoor. Sy het die werk gekry. Vir ‘n oomblik was sy stomgeslaan maar antwoord vinnig. “Beslis, ja. Dankie Mnr Greeff.”

“Die besluit was eintlik maklik. Jou Professore het met die grootste lof van jou gepraat en ons sou dom wees om jou vir ons opposisie te los. Welkom aan boord.”

“Baie dankie meneer.” Sy groet albei die mans en verlaat die vertrek eerste. Al die pad na haar voertuig toe voel dit asof sy sweef. Sy het dit gedoen. Sy het dit wraggies gedoen.

“Marieta?” roep iemand haar naam en sy draai om: “Ek is Marieta.” Beantwoord sy die persoon. ‘n Skoot knal so naby dat sy nie anders as om te koes nie. Eensklaps brand haar bors soos vuur en sy druk daarteen. Geskok kyk sy na haar hand. Dié is rooi bevlek met haar bloed en voor sy nog tot verhaal kon kom val sy slap op die plaveisel neer.

©LynelleClark2017

Onderhoud met Antoinette Venter. Die wenner van SA Skrywers se Bundel Kompetisie. Soos die Dobbelesteen Val.

Baie geluk met die vrystelling van jou nuwe boek, Soos die dobbelsteen val. Baie mense weet nie altyd hoeveel tyd in so ‘n boekvrystelling gaan nie en ek is seker jy kan boeke skryf net oor dit. Jy is ook nou betrokke by SA Skrywers en soos ek jou leer ken het is jy altyd gereed om te help. Daarom is ek dankbaar dat jy tyd gemaak het vir hierdie onderhoud. Baie dankie en baie geluk met hierdie vrystelling.

1.       Hoe het die idee van die bundel ontstaan? Skryf was nog altyd een van my passies en die lekkerste stokperdjie wat daar kan wees. Ek het voorheen meer kortverhale geskryf om voor te lê aan tydskrifte, maar toe ek sien dat SA-Skrywers ‘n kompetisie om jou eie bundel te publiseer aanbied het, het ek dadelik gedink ek moet dalk probeer. Ek het toe die stories vir die kompetisie geskryf en so is die bundel maar ‘gebore.’

2.       Ek hou van die titel van die boek wat het jou laat dink daaraan?

Die meeste van die stories is in die bundel handel maar oor hoe die “noodlot” gewonde mense getref het en wat hulle gedoen het, of nie om daarby aan te pas. (Hoe hulle gemaak het met die dobbelsteen se val – hetsy goed of sleg.) Die titel het eers aan die einde van die bundel sy “verskyning” aan my gemaak en toe moes ek maar vining ‘n oorbrugging storie skryf wat die verhale aan mekaar kan bind.

3.       Mense besef nie altyd hoeveel tyd of selfs van jou eie ondervinding gaan in so ‘n boek nie. Is daar ‘n spesifieke staaltjie wat jy ons kan vertel wat die boek lewendig gemaak het?

Ja, daar gaan nogal baie tyd in enige skryfwerk en dit is nogal moeilik om te skryf wanneer ‘n mens voltyds werk, maar die bevrediging wat die skryfwerk bied is ‘n groot belonging. In “Van brulpaddas en toiletpapier” een van die stories in die bundel, skryf ek van ‘n kroegdame wat voel sy word nie hoog genoeg geag nie, as gevolg van haar beroep en hoe sy bewys dat daar meer tussen haar ore sit as wat haar werkgewer haar wil toegee. Ek was vir ‘n groot deel van my lewe ‘n kroegdame so ek kon nogal redelik met my karakter identifiseer.

4.       Hoe lank het die skryfproses gevat?

Die bundel moes in drie-maande klaar geskryf kom, maar ek moet bieg, van die stories in die bundel is al heelwat vroeër geskryf en ek het hulle net gaan afstof en benut.

5.       Jy was die wenner van die SA Skrywers bundel kompetisie, hoe het dit jou laat voel toe jy die aankondiging hoor?

Ek het dit glad nie verwag nie en ek moes die plasing waar hulle die wenners aangekondig het, ‘n paar keer oorlees om seker te maak ek lees nie verkeerd nie 😊

6.       Het jy jou familie en vriende se volle ondersteuning of weet hulle niks?

Hulle ondersteun my regtig baie goed, maar soms moet ek letterlik met hulle baklei om my die tyd te gun om te skryf. Ek dink nie hulle besef altyd dat die skryfgogga ‘n baie opdringerige gedierte is, wat daarop aandring om gevoer te word nie.

7.       Waar het skryf vir jou begin?

Ek dink dit het al letterlik in kleutertyd begin. Voordat ek kon lees het my ouma en my ma baie stories vir my voorgelees en selfs hulle eie stories opgemaak en vertel. Nadat ek leer lees het, het ek ons kleindorpie se miniatuur bibliotekie se kinderafdeling in ‘n japtrap klaar gelees en toe moes my ouers maar bontspring om elke maand vir my ‘n boek of twee in die ‘stad’ te koop. My liefde vir skryf is ‘n direkte uitvloeisel uit my liefde vir lees. Ek het my eerste storie geskryf om koshuis-studietyd te verwyl. My Afrikaanse onderwyser het die storie raakgelees en in ons skoolkoerantjie geplaas.

8.       Wat is die mooiste terugvoer wat jy al ontvang het?

My ouma se woorde. “Ouma is trots op jou.”

9.       Daar is tye wat ‘n mens twyfel oor jou eie skryf vermoë, daar is ook tye wat kritiek jou teen die aarde kan gooi en jy dink nee wat ek sien nie kans hiervoor nie. Watter raad het jou tweemaal laat dink oor jou skryfloopbaan?

Wel, my swartste oomblik was die terugvoer wat ek jare gelede op een van my stories gekry het. Ek dink dit was vir ‘n ATKV kompetisie en die gewraakte woorde was: “Swak! Nie eens ‘n skoolopstel werd nie!”

Ek het werklik gehoop die aarde sluk my in, MAAR daar was ander kommentare ook op die einste skryfstuk en hulle was werklik positiewe kommentaar. Ek het vir ‘n rukkie my wonde gelek en toe besluit dat ek my beslis nie so maklik gaan laat onderkry nie. Ek dink een van my beste en slegste eienskappe is die feit dat ek bitter koppig is, en as ek besluit het ek wil iets doen sal ek aanhou en aanhou totdat ek dit regkry.

10.   Wat is jou raad vir aspirant skrywers?

Glo asseblief in jouself en moet nooit opgee nie. Indien jy dit kan bekostig, oorweeg om ‘n goeie skryfkursus te doen, want al het jy baie talent, is daar heelwat tegniese punte wat mens moet baasraak. (Natuurlik is daar mense wat baie goed sonder ‘n kursus kan klaarkom, maar ek het een nodig gehad om die meer tegniese punte te leer.”

11.   Wat sal jy nog als wil skryf en wat is in die pyplyn?

Ek beplan tans aan ‘n Romanza en daarna wil ek ‘n roman probeer aanpak.

12.   Wat staan jou die meeste aan in skryf?

Dit is ontspannend en lekker om ‘n karakter wat in jou kop bly te laat lewe kry.

13.   Wie is jou gunsteling skrywer en hoekom?

Chanette Paul omdat haar stories so boeiend is.

14.   Waar het jy geleer oor skryf?

Ek het by Janie van Skryfgeheime ‘n kursus geneem en ek het regtig baie baat daarby gevind. Verder het ek maar oraloor wenke en raad opgetel en dit my eie gemaak. Blaaie soos SA Skrywers is ook ‘n goeie leerskool.

Persoonlike vragies

15.   Het jy enige ander belangstelling behalwe skryf?

Ek is ‘n Rekenmeester van beroep so ek geniet syfers. Verder geniet ek dit baie om tyd saam met my familie en diere te spandeer.

16.   Is jy ‘n soettand?

Ongelukkig ja. (Ek was nie een voordat ek getroud is nie, maar my man het ‘n slegte invloed op my gehad 😊

17.   Gunsteling gereg?

Dit wissel van tyd tot tyd. Huidiglik is Sushi voor op die lys.

18.   Reis jy graag en waarheen?

Eintlik hou ek meer daarvan om by die huis te bly, maar indien ek reis verkies ek dit om na klein afgeleë plekkies te gaan.

19.   Hoe kan mense jou kontak?

Hulle kan my e-pos op: aventer43@gmail.com of hulle kan my inbox op Facebook.

20.   Facebook

https://www.facebook.com/antoinette.venter.336

Synopsis.

Soos die dobbelsteen val is ‘n kortverhaalbundel met sestien stories in.

Dit handel oor die lief en leed van gewone mense en wat hulle gedoen het met die dobbelsteen wat soms geval het soos wat hy moet – en soms nie.

In ‘Om ‘n skoenlapper te steel.’ ontmoet ons ‘n man wat omtrent enige iets sal doen vir sy sterwende dogtertjie. In ‘Haar verlore seun’ lees ons van ‘n ma wat se hart gebreek is wanneer haar enigste seun verdwyn. Daar is ook meer positiewe verhale. In ‘Van brulpaddas en toiletpapier’ hoor ons hoe ‘n rol toiletpapier die koers van jou lewe kan verander. Verder is daar ook liefdesverhale vir die romantiese siele onder ons.

Bio

Antoinette Venter woon in die 'lifelike' Jeffreysbaai omgewing saam met haar man, ouma, skoonma, vier honed en twee katte.  Haar liefde vir lees kom reeds van jongs af aan.

Vorige publikasies sluit in:

·         Verskeie tydskrifverhale

·         ‘Soos die blou roos blom’ bonus-kortverhaal in een van die Romanzaliefde e-boeke van Lapa

·         ‘Offerliefde’ in die Hartlam bundel (Tafelberg)

·         Verskeie publikasies in saamgestelde bundels deur kleiner uitgewerye.

BESTEL GERUS HAAR BOEK DIREK BY ANTOINETTE EN 

ONDERSTEUN ONS SKRYWERS.