Wednesday, January 30, 2019

Diamant Divas Droomborde, 'n Tweede vel en romanse - wat het hulle in gemeen?

Hoe gaan dit met die droomborde? 

Is julle op dreef en hoe voel julle om jul drome en verwagtinge te sien in beeld? Dit word nou ‘n groter realiteit, nie waar nie? Hoe meer jy dit sien, hoe meer sal dit begin insink. Dit is selfs goed om ‘n dagboek of joernaal nader te sleep en boek te hou van jou gedagtes en jou emosies. Dit sal jou touwys maak oor jou triggers en wat beinvloed dat jy miskien negatief raak. Wanneer jy dit neer skryf kan jy begin om daadwerklik daaraan te werk en so jou lewe weer op koers te kry. 
Dit is ook verbasend hoe positief jou gesindheid word, jy beweeg en doen met meer selfvertroue en vrymoedigheid. Nou is jy oop vir nuwe idees, nuwe geleenthede en al is daar obstacles in die pad probeer jy nou om dit uit die weg te ruim voordat jy sommer onmiddelik nee sê.
Dit is natuurlik raadsaam om ook goeie oordeel aan die dag te lê, en indien jou gut sê stap weg dit te doen en nie hardkoppig vas te klou aan iets wat jou gaan byt nie. Soms raak ‘n mens so oorywerig om iets te wil bereik dat jy daardie klein stemmetjie dood smoor ten koste van jouself.  Indien jy nie seker is nie kry jou feite eers agtermekaar, besoek Google en kyk waste inligting is beskikbaar of lees boeke, of indien jy iemand ken wie jy vertrou, vra.
As mens is ons geskape met ‘n wonderlike verdedigingdmeganisme en dit is common sense en verstand. Gebruik die twee, dit kos jou niks om ‘n paar minute stil te raak om seker te maak die stap is wel die regte rigting vir jou nie.
Wees getrou aan jouself, en leer. Dit is die enigste manier wat jy vorentoe kan gaan en werklik ‘n verskil kan maak in jou lewe.

‘n Tweede punt wat ek wil oor gesels is ‘n tweede vel. Dit is nogal ‘n belangrike tool om te hê in jou arsenaal. Nou sal jy seker in die rede wil val en my daarop wys dat jy ‘n reguit mens is wat nie ‘n moordkuil van jou hart maak nie, en dit is goed so. Maar daar is tye wat jy ‘n wag voor jou mond moet sit en stilbly. Deur net die eerste ding wat in jou gedagtes kom te praat veroorsaak meer skade as goed. Leer om te luister en dan te praat. Dit is hoekom jy twee ore gekry het, en een mond. Om tweekeer meer te luister as te praat.
Dit is juis hoekom so baie mense meer in die moeilikheid is as daar uit. En vrouens is baie skuldig hieraan.
As enkellopende persoon is daar dae wat jy tweekeer moet dink voor jy reageer. Daar sal ook tye wees was jy op jou tande moet kners en net wegstap. Op die lange duur sal hierdie manier van hantering jou meer goed doen as sleg. Kies jou oomblik van praat goed en praat dan, wees in beheer en verstandig met jou woordkeuse. Maak seker jy verstaan voordat jy toeslaan en byt.
Jy is alleen. Jy het nie iemand wat vir jou kan opstaan of verdedig nie. Mense is snaakse wesens en vererg hul sommer vinnig vir die geringste ding. Of sal dinge sê wat liewer ongesê kon gebly het. Dit veroorsaak gewoonlik ‘n geskree of vloekery – bloot net omdat mense mekaar verkeerd verstaan. Die oomblik wat jy vloek vertel dit daardie persoon dat jy besig is om beheer te verloor en dat jy eintlik nie weet wat aangaan nie.
Dit is sulke tye wat jy daardie leervel moet aantrek en mense in die oë moet kan kyk of wegstap. Nie elke geveg hoef deur jou gewen te word nie. Nie elke geveg gaan oor jou nie. Nie elke geveg hoef jy jouself te verdedig nie. Maar wanneer jy jouself distansieer van die situasie sal dit insigself ook ‘n triomftog wees.
As enkelpersoon is ons oorsensitief oor enige skewe kyk of woord wat na ons kant toe kom, maar wanneer jy jouself toelaat om stil te raak en miskien rustig te vra dat die persoon dit weer moet herhaal of moet verduidelik en jy dit weer hoor besef jy dit was toe heeltemal anders as wat jy gedink het.
Nog ‘n waarheid wat daarmee saam gaan is dat mense van jou gaan verskil en heel moontlik van jou gaan skinder – dit gebeur met die beste van ons. Die vraag is of jy jou gaan steur daaraan? Deur jou te steur daaraan gee jy hulle meer ammunisie. Mense sal glo wat hulle wil en jou verduidelikings gaan dit nie verander nie.
Indien jy ‘n fout gemaak het wees die eerste een wat omverskoning vra en stap aan, sodat jou glans dan deurskyn. Om tyd te verspil op iets wat gebeur het is ‘n vermorsing van tyd en stembande. Verander die onderwerp of stap weg tot daar genoegsame kalmte gekom het sodat albei partye rasioneel daaroor kan praat, indien dit nodig is.
Onthou, woorde wat geuiter is kan nie weer terug getrek word nie. As dit gepraat is dan is dit daar buite. Woorde maak heel maar woorde breek ook af, en lank nadat iemand iets gesê het bly daardie woorde nog agter en voed jou aksies onbewustelik. Al hierdie dinge kan jou stop om aan te beweeg.
Juis in hierdie tyd van jou lewe is dit belangrik om aan te beweeg, om jou self te skaaf tot die beste diamant moontlik. Maar jy gaan dit nie reg kry wanneer jy sensitief is oor elke liewe woord wat iemand praat nie.
Wanneer jy bereid is om kanse te vat sal mense vir jou hande klap of jou gooi met vrot tamaties. Dit is dan belangrik om ‘n tweedevel te ontwikkel. Hooggeplaastes en leiers ervaar dit eerstehands. Dink aan ‘n paar mense wat jy ken wat dit al moes trotseer. Skielik was hul lewe op die voorblad uitgebasuin. Wat was hierdie persoon se reaksie?
Dit is belangrik om gewoond te raak aan hierdie eb en vloei van die lewe. Wen en verloor. Lofprysing en haatdraende spraak. Om terug gebel te word of geignoreer te word. Soos reeds genoem in die begin, alles wat gebeur gaan nie oor jou nie. Mense raak besig, hul lewe val skielik uitmekaar of hulle vergeet en om dit dan persoonlik te vat is net tot jou eie nadeel.
Wanneer jy jou houding verander en ‘n tweede vel ontwikkel is jou lewe minder stressvol.

‘n Paar gedagtes om oor te oordink.
 • Waarvoor is jy die bangste wanneer dit kom by Kritiek?
• Ek is bang dat die Kritiek wat ek wel ontvang iets sal bewys van my, wat is dit?
(Byvoorbeeld: “Wanneer ek selfsugtige genome word, is ek in werklikheid selfsugtige of is dit net die persoon se eie onvermoë wat weerspieël word?”
“Indien ek ‘n een ster resensie op ‘n boek kry beteken dit ek is ‘n slegte skrywer?)
• Dink ‘n bietjie aan tien ander maniere wat jy kan intrepreteer as kritiek. Byvoorbeeld, die ander persoon voel bedreig deur jou, of het jou nie verstaan nie, of, maak nie saak wat jy doen nie, jy en die persoon sal net nie om dieselfde tafel kan sit nie.

Wend ‘n poging aan om jouself te vind en te deel met die dinge wat jou ewewig steur. Nou is die ideale tyd om dit te doen, niemand om jou te pla of wat jou tyd opeis nie. Maak werk van die dinge wat jou skaaf en sorter dit uit. Dit is die enigste manier om aan te beweeg.
‘n Praktiese werkie om uit te voer. Een wat nogal ‘n mens se oë oop maak, maar ek wil hê julle moet fisies sien of daar enige reaksies is. Besoek Amazon.com se boek afdeling. Soek jou gusnteling skrywers op en gaan lees die een ster resensies. Dan lees jy ‘n klomp 5 ster resensies. Wat weeg die grootste in jou kop? Het die skrywer of agent daarop gereageer? Hoe sal jy voel as jy sulke kritiek moet kry?
Wend ‘n doelbewuste poging aan om die negatiewe kritiek te vergeet en te konsentreer op die goeies. En leer. Moenie in ‘n hoekie gaan wegkruip nie. Leer, en maak daardie vel van jou dikker. Op die ou einde sal jy ‘n gelukkiger persoon wees.

Op hierdie stadium is jy dalk nog rou en sien glad nie kans vir enige romanse nie, om nie eers te praat van ‘n verhouding nie. Vir ander, wat nou al ‘n rukkie alleen is en die ergste skokke verwerk het en gereed is om weer die waters te toets is dit dalk ook ‘n tammeletjie.
Vernaam as jy lank getroud was en die romanse gedeelte lankal weg geval het. Dan het jy geen benul wat jy eintlik soek nie. Of jy het ‘n idee maar weet nie hoe om te werk te gaan nie.
Kom ons fokus eers op die seer groepie wat nog wegskram van enige iets wat liefde insluit.  Ek verstaan baie goed waar julle is, was self ook daar. Dit is ‘n baie teer tyd in jou lewe en nie almal om jou gaan dit verstaan nie. Maar jy skuld dit aan jouself om weer die mooi raak te sien en die bril van hartseer weg te gooi.
Om dit die beste te antwoord moet eers kyk wat is romanse.
Romanse is daardie geheimsinnige gevoel wat elke verhouding uniek maak. Dit is die klein dingetjies wat wys jy gee om sonder groot fanfare. Dit bind twee mense saam as ‘n eenheid en maak dit besonders en uniek.
Het jy geweet jy kan ook met jouself ‘n romantiese verhouding hê. Immers verstaan jy jouself beter as wat enige ander mens kan. So om Byvoorbeeld op te staan en ‘n blom te pluk wat jy naby jou hou, op die lessenaar of waar jy besig is, is ‘n tasbare bewys dat jy lief is vir jouself.
Die feit dat jy opstaan, oefen, stort en jouself mooi maak doen iets aan jou as vrou maak nie saak wie anders sien dit raak nie.
Romanse beteken in kort – om tyd te maak vir jouself, jouself te bederf en lief te hê.
Op my blad gaan ek skakels plaas van hierdie onderwerp maar die een wat ek wil he julle almal moet luister na is die een van Tracy McMillan. WOW is al wat ek kan sê. Die dame was drie keer getroud en geskei kom uit vele mislukte verhoudings insluitend die van haar ouers. Maar wat uitgestaan het van haar is haar vermoë om op te staan en te verander. Ten goede. Doen jouself ‘n guns en knyp die 15-minute af en luister na haar. Ek kan julle waarborg dit is die moeite werd. Die video clip handel oor self liefde. Indien jy nie met jouself kan getroud raak en in ‘n goeie verhouding is nie gaan die res van jou lewe ook uitmekaar val. Sy verduidelik dit baie goed deur haar eie lewe en hoekom dit so belangrik is.
As enkel persoon is dit nie die einde van jou lewe nie, dit is net ‘n nuwe begin en hoe vinniger jy jouself lief het hoe beter sal jou lewe word. Selfs ‘n inspirasie vir ander vroue.

The person you really need to marry | Tracy McMillan | TEDxOlympicBlvdWomen



Vir die vrouens wat reg is om aan te beweeg geld dieselfde bostaande gedeelte. Net wanneer jy werklik waar vrede gemaak het sal jy ware geluk vind.
Jy het geen rede om hals oorkop in ‘n new verhouding te val nie. Jy het tyd aan jou kant. Ongeag jou ouderdom het jy tyd om reg te kies.
Vir jou is romanse dalk die meer tasbare sy daarvan. Jy is honger vir aanraking en koestering. Jy smag na daardie eenheid wat net ‘n verhouding kan bied.
Om romanties te wees beteken dat albei partye moet gee en indien jou nuwe maat se lewe net om homself draai is dit duidelik nie die regte maat vir jou nie.
Onthou jy hoef nie die eerste man, wat vir jou ogies maak te kies nie. Jy kan kies en keur, en omdat jy alreeds ‘n inhoudsopgawe het van wat is verkeerd vir jou soek iemand anders uit met wie jy wel ‘n gemaklike verhouding kan hê.
Ek sal ook ‘n video clip skakel plaas op my blad van Joanne Davila wat gesels oor gesonde verhoudings. Kyk gerus daarna en kyk hoe dit van toepassing is vir jouself.

Skills for Healthy Romantic Relationships | Joanne Davila | TEDxSBU

Hier is ‘n paar punte van romanse om dit teen te meet

1. Hoe gemaklik kan julle kommunikeer.
2. Maak julle tyd vir mekaar gedurende die dag om tyd saam te spandeer.
3. Kan julle intiem verkeerd bv ‘n slow dance waar net julle twee bestaan. 
4. Doen iets besonders soos verras mekaar met ‘n piekniek of bak ‘n lekker koek. Vir geen rede op hierdie aarde maar om by mekaar te wees. Onthou seks is nie die enigste manier om alleen tyd te ervaar nie.
5. Moenie wag vir hom om te reageer nie. Doen iets.
6. Daar is vir my niks meer romanties as ‘n soen op die voorkop.
7. Help mekaar met klein of groot takies. Al is dit dan net om te tang aan te gee terwyl hy besig is.
8. Omhelsing is ook ‘n groot romantiese faktor, daardie spesiale manier van drukkies wat jy by niemand anders kry nie. Indien dit lei na gemeenskap, goed so, indien nie, ook goed. Nie alles hoef te eindig tussen die lakens nie.  
9. Stuur vir mekaar mooi boodskappe. Soetsappig, maar dit doen tog iets om die lug te suiwer en gemoedstemming reg te kry. 
10. Kook ‘n spesiale ete.
11. Kyk saam ‘n romantiese fliek. Maak dit interresant deur ‘n heerlike bottle wyn en poeding by te voeg.
12. Ek is ‘n groot voorstander van massering. Dit help om te ontspan, bou kommunikasie en is net goed vir die algehele vibe tussen julle.
13. Sorg dat daar altyd iets spesiaal in die yskas is.
14. Dra parfum, doen moeite met jouself al is dit net in ‘n denim en top.
15. Maak vir die persoon ‘n heerlike koffie soos hulle daarvan hou. 
16. Maak oogkontak. Dit is belangrik om enige gevoelens te verstewig in ‘n verhouding.
17. Sit langs mekaar by ‘n eetplek, snuggle en gesels lekker saam.
18. Speel jul gusnteling musiek of liedjies, verbasend wat dit kan doen om die atmosfeer te draai
19. Neem fotos van mekaar en raam dit.
20. Kyk saam die sterre of gaan stap lang engte.

Goeie verhoudings begin deur te gesels. Om mekaar te leer ken deur stories en staaltjies. Jy hoef nie al jou hele hart op die eerste aand se kuier te sit nie. Toets eers die grond deeglik voor jy oorgaan tot verklarings van liefde. Dit is raadsaam om te wag daarmee tot jy reg is en nie omdat jy geforseerd voel om dit te se nie. Indien hy nie daarvan hou nie en ook nie kan verstaan nie sou ek aanbeveel om hom die deur te wys.
Om vandag se program saam te vat.
Droomborde en joernale is ‘n moet in hierdie tyd van ontdekking en nuwe besluite neem. Dit gee jou die selfvertroue om take aan te pak.
Kry ‘n tweede vel is belangrik in oorleweing. Kies jou gevegte reg en jou woorde mooi. Nie alles gaan oor jou nie.
Moenie van jou romantiese sy vergeet nie. Bederf jouself. Koop daardie mooi nommertjie en vat jou self uit vir ‘n ete. Die mense sal niks dink nie. Sommige sal jou admireer omdat jy braaf genoeg is om dit te doen.
Maak kontak met mekaar, wees daar vir mekaar.
Moenie jou vooropgestelde idees vir romanse so stel dat jy ‘n verhouding sink nog voor dit begin het nie.
Onthou dat jy besig is met ‘n slyp proses. Die tyd wat jy insit om te skaaf aan jouself is die persentasie glans wat jy kry. Poets jouself totdat jy skitter.

Tot ‘n volgende keer, mooi loop diamante.  




ELAN GLOBAL RADIO
Die Stasie Vir Passievolle Mense

Facebook: Elan Global Radio Kuier en Klets https://is.gd/s1PX8T
Twitter: Elan Global Radio
Instagram: elan_global_radio
WhatsApp: 066 305 3580

Facebook blad Diamant Divas 
SKAKEL IN: 
SIMPLE RADIO App.
http://www.liveonlineradio.net/south-…/elan-global-radio.htm


Tuesday, January 22, 2019

Diamant Divas Die WOW Faktor



Is jou lewe WOW of kruip jy eerder weg in ‘n hoekie?


Wonderlik
Ongelooflik
Wenner

Dit is waarvoor my afkorting staan.

Kan iemand dit van jou sê?
As die antwoord nee is, Hoekom het jy opgegee? Of glo jy die negatiewe dinge wat mense van jou sê en jy van jouself dink?
Dit is baie maklik om negatiewe invloede / woorde te glo. Dit kom sommer so van self. Enige gedagte of gesprek kan dit prikkel. Jy weet dit is om soos stout te wees, dit gebeur net. Indien ‘n kind nie geleer word nie dan doen hy die verkeerde ding. Daarom is dit belangrik om hom te leer – soms deur herhaling voor hy/sy snap dat dit verkeerd is. Dit vat tyd en baie moeite maar die oomblik wat hulle dit hul eie gemaak het is dit tyd om aan te beweeg na die volgende les. Dan wil dit ook nou nie se dat hulle dit nie weer gaan probeer nie, maar ten minste weet hulle nou die bepaalde aksie is verkeerd en daar gaan gevolge wees. Dit is hoe ‘n kind gevorm word en grondslag of fondasie gelê word.

Net so is dit met gedagtes verander. Jy moet geleer word om positief te dink. Jy moet geleer word om te glo in jouself. Jy moet geleer word om weer op te staan en aan te gaan.  Daarom kom die lesse onverpoos oor jou pad. Jy moet leer om geduldig te word. Jy moet geleer word om nie meer te rook nie. Dit vat tyd en baie opoffering maar dit is die moeite werd die oomblik wat jy dit reg kry. Jy voel sommer goed oor jouself en die verskille is dadelik opmerklik.

Dit is soos boek skryf. Jy mag al die reels op die punte van jou vingers ken maar dit is slegs in die toepassing daarvan wat jy werklik resultate sien. Jy skryf, en skryf weer – totdat. Die oomblik wat jy ophou verloor jy jou selfvertroue. Daarom, my raad aan enige voornemende skrywer is skryf.
Daar is nie ‘n ander manier nie. Dit kos herhaling, dit word genoem die slyp prosses, om werklik te kan skitter.

Daarom is dit belangrik om jouself te voed met die goeie. Deur opbouende boeke te lees, ‘n opbouende woord te hê wat dien as motivering. ‘n Droombord wat jy kan sien. Ek sal graag wil sien wat julle so ver al daarop het, stuur ‘n foto na my blad toe.
Hoe gaan jy by ‘n punt kom om jouself op te bou as jy nie in jouself begin glo nie?
Of as jy iets begin doen het om jou uitkyk te verander nie? Daar is net een manier om by die skitter uit te kom en dit is aksie.

Doel lei na Aksie wat lei na resultate. Jy moet weet waarheen is jy oppad. Wat is jou doelstellings, het jy dit al neer geskryf? Of gaan dit koolstof drome bly?
As enkel persoon is daar net een persoon wat jou voor die TV gaan weg kry, en dit is jy.
Die TV is goeie afleiding maar wanneer dit die enigste ding is wat jou aandag vashou het jy probleme. Jy word lui en pleinweg besig om sleg te word. Indien ek op jou toon trap – goed so. Verskonings maak gaan jou nie van die rusbank af kry nie. Aksie gaan jou daarvan afkry.

Indien ek nie canvas nie – kry ek nie listings nie. Indien ek nie myself daar buite sit nie gaan niemand weet van my nie. Indien ek nie waag nie gaan ek nie wen nie. Dit is my motto. Wat is joune?
Dit is die bottom line.
Wanneer jy doen begin die adrenalien vloei. Die blote gevoel van accomplishment laat jou bloed bruis. Dit is nog beter as ‘n orgasme. LOL
Die high om te werk en iets te vermag is ongelooflik motiverend. Jou uitkyk verander ook, drasties. Skielik sien jy kans vir meer. Jy soek die volgende uitdaging naarstiglik. Jy wil weer daardie buzz ervaar.

Dit is hoekom skrywers aanhou, ten spyte van die afkeure, afjakke en algemene Kritiek. Jy jou aan. Jy leer om ‘n tweede vel te kry. Met elke stappie beweeg jy onbewustelik vorentoe tot ‘n dag wat jy stop en jy na jou asem snak. Dit is die WOW oomblik.
Nou is my vraag weer: Beleef jy so ‘n WOW oomblik wat jou asem weg slaan?

Wat verhinder jou?

Tyd? / Te besig? / Kort motivering / weet nie wat jy wil doen nie?
Ons almal is besig, het te min tyd – eintlik het ons nie. Elkeen het ewe veel tyd 24 uur vir elke dag, 365 dae se tyd. Die antwoord is eintlik heel eenvoudig. Hoe belangrik is dit vir jou?
Jy sien, as dit belangrik was sou jy tyd maak. Vroeër opstaan, minder tyd voor die TV spandeer. Die foon neersit. FB toemaak. Ja maar jy weet nie, jy ken nie my omstandighede nie.
Ek is alleen, voel moeg, is moeg gesukkel. Dit klink net na nog werk. Jy ken my nie. Ek begin met ‘n ding volstoom net om te stop wanneer ek die eerste hobbeltjie tref. Die kinders vat al my tyd.
Ek dink julle weet waarheen is ek oppad. Daar is net verskoning op verskoning to daardie dag, tien jaar later en jy kyk terug en jy wonder wat het jy met jou tyd gemaak. Hoekom het jy nie tyd aan jouself spandeer nie. Dit is dan wat spyt te laat kom. Tyd kan nie terug gekoop word nie. Dit is onherroeplik verby.

Wanneer kom jy eerste?

Verstaan my mooi, ek sê nie jy moet die res van jou lewe verontagsaam of nie ‘n mooi fliek kyk of selfs ontspan nie. Natuurlik is jou kinders belangrik. Natuurlik stel die werk eise en jy word moeg. Natuurlik is daar geld te korte wat jou terug hou. Daar is dae wat jy moeg voel en net nie meer weet watter kant toe nie. Ek het begrip daarvoor. Ek verstaan elkeen van hierdie dinge. Die lewe is nie maklik nie, verseker. Wanneer ek so begin te praat dan moet jy weet ek praat met myself ook. Iemand het my eendag gemaan om nie te hard te wees met myself nie maar ek lusiter nie altyd na daardie raad nie. Vir my is dit belangrik om te slaag. Die rede is tweeledig. Ek is nie meer ‘n kind wat 80 jaar het wat voor my le nie. As ek gelukkig is het ek dalk nog 30 jaar om te gaan. Ek wil aan myself bewys dat ek meer is as net vrou of ma.
Wanneer ek aandag gee aan die dinge wat vir my saak maak is dit asof ek nuwe energie kry. Skielik kry jy meer tyd om goed te doen of is dit nou omdat jy beter beplan.
Hoe ookal. Jou tyd en lewe is kosbaar en jy skuld jou self daardie WOW oomblik. Daardie super amazing oomblik wat jou laat sweef bo al die probleme.
Die lied sê nie verniet sweef soos ‘n arend nie… hoekom?
Hoekom kan jy nie soos ‘n vink vlieg of ‘n mossie of parakiet nie. Is jou eerste vraag om daaruit te kom? Jy sien ek ken jou. Praat van ondervinding… lol
Ons sal enige iets doen om daar uit te kom.

Sweef soos 'n arend

Sag, sag blink jou oë
Uit jou gesig gloei liefdeslig
Knus, knus in my arms
Heilig, veilig, warm

Ek het jou nodig, hier by my heeldag, die wêreld oorbodig
Ons twee 'n taakmag, niks kan ons keer
Hy's in beheer, Hy's ons leidsman, stuurman, weerman

Sweef soos 'n arend, want sy liefde dra ons so hoog, hoog bo die son
Sweef soos 'n arend, so ver soos die wind waai my lief
In die Here se krag

Sprei, sprei maar jou vlerke
Daar's steeds 'n band, van hand na hand
Maak, maak my jou toevlug, roep my, soek my, spoedig

Saam is ons alles, leef ons uitbundig, en dit wat bedoel is
Gee ons ons beste, niks kan ons keer
Want Hy's in beheer, Hy's ons leidsman, stuurman, weerman

Sweef soos 'n arend, want sy liefde dra ons so hoog, hoog bo die son
Sweef soos 'n arend, so ver soos die wind waai my lief
In die Here se krag

Sweef soos 'n arend, want sy liefde dra ons so hoog, hoog bo die son
Sweef soos 'n arend, so ver soos die wind waai my lief
In die Here se krag



Dit is nie net God se liefde wat my dra nie maar ook geloof in myself. Vader gee my die fondasie en geraamte van my lewe. Maar die vleis gedeelte hang van my af. Jy kan die Bybel lees en kerk toe gaan, maar as iets nie hier binne gebeur om jou te laat sweef nie gaan jy nooit van die grond af kom nie.
Dit gaan oor attitude. Dit is jou houding wat gaan bepaal wat jy met jou ure, dae, maande en jare gaan doen. Die tools wat ek jou gee is als gereedskap maar as jy dit nie jou eie maak nie kan ek jou nie help nie. Hier is ons elkeen op ons eie.

VRAE OM TE OORDINK

• Wat is die asem-snak aksie wat jy gaan neem om toe te pas in jou lewe, in jou gesinslewe en verhoudings?
• Wat is jou asem-snak aksie wat jy gaan neem in jou werk of professionele lewe?
• Wat is jou asem-snak aksie wat jy gaan neem in jou persoonlike lewe?
• En laastens, wat is jou asem-snak aksie waartoe jy die week gaan maak wat jou asemloos gaan laat? 

HUISWERK VIR DIE WEEK

Kies ‘n asem-snak aksie elke dag, en doen dit.
·         Dit kan enige iets wees – gaan stap of doen ‘n paar oefeninge.
·         Kry ‘n paar minute langer slaap in. Jy sal verbaas wees wat daardie paar minute ekstra kan doen
·         Begin met jou droombord.
·         Indien jy werk, kyk of jy nader aan jou werk kan trek.
·         Gaan loop in die tuin eerder as om voor die TV te sit
·         Lees ‘n selfhelp boek se eerste hoofstuk. Kyk hoe jy dit kan toe pas.
·         Lag meer
Dit is klein aksies maar dit is motiverend. Die positiewe aksies skei ‘n hormoon af wat jou energiek laat voel. Jy voel weer lus vir die lewe.
Volg dit getrou na. Wees getrou aan jouself! Dit is werklik baie belangrik.

Ek het weer so bietjie navorsing gedoen en op die inligting afgekom wat dit mooi onderstreep.
Helgo Schomer, ‘n gesondheidsielkundige het die volgende raad aan ons.

       1. KYK EN LEER
Hoe vroeër jy aan 'n selfversekerde rolmodel blootgestel word, hoe beter is dit vir die ontwikkeling van jou eie selfvertroue. Maar daar is een voorwaarde: jou rolmodel moenie egosentries wees nie. Hy of sy moet ook in jou belangstel.
Kom ons veronderstel jy word saam met 'n gladdebek-ouer broer groot; as sy selfvertroue hom selfsugtig of egoïsties maak, sal jy meer geneig wees om dit as negatief te ervaar en dit te verwerp. Maar laat daardie broer jou onder sy vlerk neem, en jy sal na hom opsien en leer uit sy sosiaal bedrewe styl.
Aksieplan: Dit is nooit te laat om 'n mentor te kry nie. Kies 'n vriend, kollega of familielid wat selfvertroue uitstraal en 'n aanvoeling het vir sosiale interaksie – maar maak seker dis iemand met nederigheid wat jou beste belange op die hart dra. Dan moet jy kyk en luister en dié persoon se optrede ontleed. Gee veral aandag aan hoe hulle praat, loop en hul fisieke houding. As jy selfvertroue in aksie sien, is dit die eerste stap om jou eie selfvertroue op te bou.

2. Praat met jou lyf
Jou fisieke houding weerspieël jou bui – as jy depressief voel, is dit waarskynliker dat jy sal slenter, jou arms sal vou of sal frons. Maar dit werk ook andersom, want wanneer jy jou liggaam toevou en jouself "vashou" (deur byvoorbeeld jou arms te vou), vloei daar minder "gelukkige hormone" deur jou brein.
Dit is dus duidelik dat jou bui jou liggaamshouding kan na-aap. Wanneer jou liggaam en gesig selfversekerdheid uitdruk, word dit dikwels deur werklike selfversekerdheid gevolg.
Aksieplan: Werk daaraan om 'n oop postuur te handhaaf. Hou jou rug reguit, skouers terug, kop regop en jou arms ongevou. En oefen om lang, sterk treë met dié oop houding te gee. Hoekom dink jy leer hulle modelle om so te stap? Omdat dit selfversekerdheid uitstraal.
Laat jou lyf vir jou werk deur reg aan te trek. As jy soos 'n boemelaar lyk, sal jy soos een voel, maar as jy in 'n rooi nommertjie of 'n snyerspak verskyn, sal jy outomaties meer selfversekerd lyk en optree.

3. Praat harder
Skaam mense praat saggies, asof hulle nie gehoor wil word nie. Jy hoef nie te gil of te skree om selfvertroue op te wek nie, projekteer net jou stem – ’n bietjie harder as wat vir jou gemaklik is. Dit sal nie vir ander mense so hard klink nie en jy sal jou persoonlikheid beter laat geld.
Aksieplan: As jy in 'n sosiaal uitdagende situasie is, wag 'n oomblik voor jy begin praat en herinner jou daaraan dat jy iets positiefs het om by te dra. Sê dit dan. Mooi hard.

4. Spieëltjie aan die wand...
Dit help om jouself vol selfvertroue te sien – veral as skaamheid jou aan jou sosiale vaardighede laat twyfel. Wanneer jy 'n prentjie van jouself in jou kop het as iemand vol selfvertroue, sal jy dit makliker vind om sjarmant te wees en die verskillende selfvertroue-wenke wat jy geleer het, op die proef te stel.
Aksieplan: Sit elke week 'n bietjie eie-tyd opsy en eksperimenteer met gesigsuitdrukkings en die houding wat hier bo beskryf is. Kyk hoe ontspanne jy lyk wanneer jy oogkontak maak, glimlag, en regop staan. Sien dan daardie beeld voor jou geestesoog wanneer jy voel jy wil toeslaan.

5. Bou dit stadig op
Moenie aan die sosiale diep kant inspring voor jy reg is nie. Dit dien geen doel om by 'n partytjie ogies te maak as jy nie die selfvertroue het om verwerping te hanteer nie. As jy jou te gou onder te veel druk plaas, kan dit jou selfvertroue 'n knou gee eerder as om dit te versterk.
Aksieplan: Oefen jou selfvertroue in situasies wat stadigaan ál uitdagender raak. Begin met 'n omgewing wat nie juis uitdagend is nie (alleen, voor 'n spieël) en vorder dan na 'n situasie wat 'n effense uitdaging bied, soos 'n koffiewinkel. Bou stadig op na 'n hoogs bedreigende situasie soos 'n toespraak, of om iemand uit te vra. Die belangrikste is om jou nie te verknies oor die foute wat jy gemaak het nie. Beloon jou liewer vir klein prestasies en persoonlike oorwinnings.

6. Speel maar toneel
Partykeer moet selfs die mense met die meeste selfvertroue toneelspeel. Hulle gesels ewe vrolik terwyl hulle eintlik onder die tafel wil inkruip. Ons kan almal voorgee. En ’n dapper front lok ’n positiewe reaksie uit, wat regte selfvertroue skep sodat jy nie meer nodig het om voor te gee nie.
Aksieplan: Oogkontak kan selfvertroue projekteer, maar as jy erg skaam is, is dit dikwels moeilik net om iemand in die oë te kyk. As jy sukkel, moenie direk in die persoon se oë kyk nie, maar fokus liewer op sy of haar voorkop. Dit skep die illusie van oogkontak sonder die angs van die ware Jakob.
Aanvaar wie jy is. Dit sal jou vry maak.

3. Neem beheer in jou lewe: Jy kan nie beheer van jou lewe neem sonder God en Sy hulp nie. Sonder God is ons niks. Stel Hom eerste. Besluit wat is belangrik in jou lewe en waarna jy strewe.  Moet nie soos die Engelse sê 'n "People Pleaser" wees nie. Mense sien deur mens en gou sal hulle jou uitspoeg. As ons mense najaag en wil gelukkig hou kan jy nie jouself ken en God se wil doen nie. Hou jou oë op God gefokus en doen Sy wil en jy sal gelukkig wees. God sal deur jou na ander skyn. Daardeur neem jy verantwoordelikheid vir jou optredes, gevoelens en rigting waar in jou lewe beweeg.

4. Selfgelding: Elke vrou het die reg om te besluit hoe sy haar lewe wil lei. Die doelwitte wat jy vir jouself stel, die waardes in jou lewe. Jy moet die gewoontes van stilte verbreek en jou behoeftes uitspreek asook jou begeertes. Wanneer jy begin om standaarde daar te stel, sal die mense om jou ook weet wat jy van hulle verwag en waar hulle met jou staan. Dit maak klaar 'n kanaal vir kommunikasie in jou gesin en omgewing oop.


5. Triomfantlike Waardes: Waardes is jou eie ideale en beginsels wat jou lei in jou daaglikse lewe. Dit beinvloed jou verhoudings, gedrag, keuses en gevoel. Asook jou selfbeeld. Vroue met 'n hoë selfagting is baie duidelik oor wat hulle glo en waarom. Hulle is gemaklik met hulle waardes. God verwag nie minder van ons as vroue nie.

Om by hierdie bogenoemde stappe te kan hou moet jy alle negatiewe gedagtes, houdings, gewoontes uit jou lewe uitskuif wat jy in jou lewe ontwikkel het.


Dankie vir die saam luister en ek hoop ek sien darem een of twee droomborde binnekort.
Skitter net waar jy is, diamant
Totsiens

Lynelle se Pinterest Droombord, volg my gerus.
ELAN GLOBAL RADIO
Die Stasie Vir Passievolle Mense

Facebook: Elan Global Radio Kuier en Klets https://is.gd/s1PX8T
Twitter: Elan Global Radio
Instagram: elan_global_radio
WhatsApp: 066 305 3580

Facebook blad Diamant Divas 
SKAKEL IN: 
SIMPLE RADIO App.
http://www.liveonlineradio.net/south-…/elan-global-radio.htm






Wednesday, January 16, 2019

Diamant Divas - Brandstof vir die siel.


Wat bou jou op, laat jou voortbeweeg. Wat maak jou opgewonde?

Ek spring sommer weg met ‘n paar moeilike vrae. Vir sommiges mag dit dalk maklik wees maar vir die meeste luisteraars is dit vrae wat hulle mee sukkel, selfs tot diep in hul veertigs of vyftigs.

Veral nou dat jy op ‘n nuwe pad is kom hierdie vrae weer skerp onder die soeklig en wonder jy wat is jou doel. Waarom is jy hier?

Vroeër of later word ons almal met dit gekronfronteer. Sommiges kan kies om werklik antwoorde te gaan soek soos die jongman, Tal Gur van Israel. Ek het al ‘n paar keer uit sy boek, The art of living voorgelees. Hy het letterlik vir homself doelwitte gestel wat hy dan na ‘n sekere tyd bereik het. Vandag is die man ‘n motiveringspreker wat duisende mense inspireer deur dit wat hy geleer het. Ek het al van Sunitkia gepraat wat vanuit haar ellende opgestaan het en daadwerklik ‘n verskil gemaak in haar gemeenskap. Die lys is eindeloos.

Ek is seker julle het ook al sulke stories gehoor wat julle heel moontlik geinspireer het, maar julle weet nie waar om te begin nie. Ek self was deur Janine Shapiro se man in ‘n hoek gesit toe hy die vraag, wanneer laas het jy gedroom, aan my gestel het. Dit is waar ek geleer het van droomborde.

Ek was bewus daarvan dat ‘n mens verskillende visuliaserings borde kry, veral kuns studente moet dit gereeld maak. Maar ‘n droombord, nee, ek was totaal onkundig daaroor. Toe volg ek hul raad en kort voor lank het die bord op my rekenaarskerm vorm aangeneem.


Ek leer makliker deur visualiseering en, indien julle my praatjies volg sal julle weet ek het al ‘n paar maal gepraat van Droomborde of Vision bords en hoe dit my gehelp het in my pad van genesing.

Wanneer jy iets fisies voor jou sien, reageer jy makliker en vinniger daarop. Wanneer jy ‘n beroep sien wat jy graag sal wil betree dan plak jy dit op hierdie bord. Of in woorde bv, prokureur, of ‘n fisiese prentjie van ‘n dame wat in die hof staan… Hopelik aan die regte kant van die gereg.

My onafhanklikheid was ongelooflik belangrik, en dan ook stabiliteit. So die eerste prentjies wat op my bord verskyn het was werk, ‘n woonplek en motor. Omdat ek ondervinding het as administratiewe dame het ek ‘n kantoorjuffrou wat by haar lessenaar sit en werk op haar rekenaar op my bord gesit. Ek het my self gesien agter daardie tafel sit en werk. Toe het ‘n mooi foto van ‘n mooi woonstel, met ‘n tuin gevolg. Nie ‘n groot plek nie. Net cosy genoeg vir my. Toe ‘n kar. ‘n Praktiese een en dan een van ‘n bloedrooi Mustang. Die is natuurlik nog ‘n droom maar ai my hart trek darem ‘n punt as een verby my ry.

Stelselmatig het nog meer dinge op die bord verskyn. Meubels, kruideniersware, klere, kombuisware, mooi kunswerke, ‘n vakansie of twee. Nog gepubliseerde boeke. Selfs drome wat ek nog nooit verwoord het nie het begin verskyn op die bord en ek het myself begin inleef daarin. Dit was my anker, my aansporing en my fokus. Dit het my brandstof vir my siel geword wat my daagliks gevoed het om hoër te klim. Om nie vas te hou aan die leuens wat aan my vertel is al die jare nie. Ek het begin uitstyg bo my eie tekortkome en deure het begin oop gaan.

“What does a knock-the-ball-out-of-the-park life look like to you? What is the career that seems so incredible you think it’s almost criminal to have it? What is the dream you don’t allow yourself to even consider because it seems too unrealistic, frivolous, or insane? Start envisioning it. That’s the beginning of having it.” Tara Mohr

Daar is tye op hierdie pad wat jy baie moedverlore gaan voel, selfs raadop. Daar gaan tye wees wat jy wonder of dinge ooit weer reg sal kom maar, indien jy nie jou self motiveer en inent met die nodige brandstof nie gaan jy letterlik op moedverloor se vlakte sit. Jou lewe gaan een lang uitgerekte lewe word en soos ‘n marmot gaan jy die wiel laat tol sonder enige einddoel.

Dit is nodig dat jy in hierdie tyd gefokus raak. Die daaglikse worstelinge kan jou so maklik aftrek na die bodem toe en jou daar hou dat jy dood van binne sal voel.

Maar wanneer jy gefokus raak word die worstelinge draagliker, meer beheerbaar. Jy sien elke struikelblok as ‘n groei proses, ‘n inspuiting as te ware van nuwe lewe. Wanneer jy gefokus raak droom jy. Drome word realiteit en jy begin om met nuwe oe na die wêreld te kyk. Dit is dan wat jy ‘n gaping byvoorbeeld sien en jy stap in en doen iets daarmee.

Geleenthede kom nie as jy op Faceboek kerm en kla en vir vreemde mans geld vra nie. Ek is jammer as ek op ‘n paar tone trap maar ek sien dit soveel kere, vroue wat bedel, oop en bloot. Mensie, dit is onaanvaarbare gedrag. Dit maak jou meer seer as goed. Jy is nie ‘n bedelaar nie. ‘n Ander persoon man of vrou is nie jou oplossings nie. Nee, geleenthede kom wanneer jy jouself anders instel, verby die onmiddelike kyk en fokus.

Jou siel moet gevoed word met ‘n konstante inspuiting van nuwe lewe. Boeke is ‘n groot teenvoeter van die dag tot dag probleme. Dit gee jou die kennis wat jy nodig het en help jou om te vergeet van die te korte en verder te kyk. Soms tel jy goeie idees daarin op en jy wonder hoe jy dit kan laat werk vir jou.

Die Bybel is natuurlik ook ‘n groot bron van inspirasie wat jou siel voed.  Die beste brandstof wat jou heel maak in elke area. Dit is goed om by ‘n woordgefundeerde sel of kerkgroep aan te sluit wat jou fokus weg van jou probleme sal vat en jou laat fokus op die woord.

Indien jy in die posisie is om ‘n lappie aarde te hê, is dit net so ‘n goeie plek om nuut te word. Die natuur se rustigheid maak jou kop skoon, verwyder die muisneste en spinnerakke.

Probleme is daar om ons te leer hoe die lewe werk. Dit leer ons wat is nuttig en vorm ons lewe maar is nie gemaak om daarby stil te staan nie. Dit is net ‘n stadium in ons lewe wat ook verby sal gaan. Dit definieer ons nie. Onthou probleme is ook tydelik en dit sal oorgaan, soos enige storm.

Kom ons stop en dink bietjie oor die volgende vrae:
    ·         Hoe lyk jou knock-the-ball-out-of-the-park lewe?
·         Wat is die beroep wat jy graag sal wil beoefen?
·         Wat is jou droom, die een wat jy jouself nie toelaat om te droom nie, wat selfs onrealisties lyk? The impossible dream.
 Huiswerk vir die week:
Hoe het dit verlede week gegaan, kon jy dit regkry om getrou te bly aan jou woordkeuse vir elke dag? Ek hoop so.
Vir die week wat voorle wil ek hê jy moet die antwoorde op die vrae gaan oordink en daaroor mediteer. Maak doelbewus tyd daarvoor. Sit elke negatiewe gedagte eenkant oor hoe jy dit nie gaan maak nie en vervang dit met die vraag hoe gaan ek dit doen? Daardie antwoorde sit jy om in prentjies en skep jou eie droombord.
 
Picture from Google

Vir ‘n oomblik wil ek stilstaan by die pyn van ‘n gebroke hart.

 As enkellopende bevind die meeste mense hulle vroeër of later hier. Selfs mans ervaar dit. Afgesien van al die probleme wat jy ondervind is jou hart seker die een orgaan wat die meeste ly. Die meeste van die tyd in stilte. Soms is dit ‘n fisiese pyn en geen pynpil help daarvoor nie. Drank mag dalk dit verdof maar dit is stil, kloppend net onder die oppervlak.

Hierdie seer kan jou laat reageer op verskillende maniere. Woede, trane, verwerping, irrasionele uitbarstings, selfs onttrekking. Alhoewel dit op die oomblik voel dat jy nooit weer heel gaan word nie – is daar tog goeie nuus.

Jy sien wanneer jy jou fokus skuif en fokus op die dinge wat jy kan verander dan word dit minder, en verdwyn. Tyd is jou enigste bondgenoot hierin. Niks gaan dit gesond maak soos tyd nie. 

‘n Gebroke verhouding is die bron van baie negatiewe gedagtes. Dit is dan maklik om op FB groepe te gaan waar jy negatiewe dinge sê of verklaar dat jy mans haat. En jy sal jou volgelinge kry.  Baie van hierdie vrouens is bitsig en verdra nie dat jy hulle vertel om hul houding te verander nie; kort voor lank kan jy saam praat. Aangevuur deur hul haat. Dit is die soort brandstof wat jy moet vermy. Hulle verbitterdheid gaan jou net sus en jy gaan glo dit moet so wees en jy deel nie met die pyn nie. Dit is nog daar, net verbloem en jy stel die onvermydelikke uit.

Dit is absoluut fataal om toe te laat dat jou emosies jou in hierdie tyd beheer. Jy stel jouself op om nog verder seer te kry. In hierdie tyd is dit beter om eerder deur die emosies te werk. Praat met iemand hieroor, praat met die Vader daaroor, deel met elke seer en elke gedagte wat dit prikkel. Skryf dit neer en verbrand die papier. Hoe ookal jy besluit om met dit te deel, deel daarmee.

Jy wil nie verander in ‘n verbitterde vrou nie. Nee, jy wil skitter. Jy wil blom. Jy wil lewe.
Daarom gee jouself die tyd.

Ek lees graag ‘n gedig voor van Jacques van Zyl.

Dis nie my plek nie
Die wêreld is nie my plek nie
Dis waar ek vertrek
Ek gaan maar net hier verby
Sal nie lank hier bly nie

Ek sien

Soveel somber mense
Sonder mooi wense
Hulle swoeg en hulle sweet
Word gou vergeet

Ja dit alles

Is ‘n gejaag na wind
Wat jou verblind jou bind
Aan dinge doelloos
Aan dinge soms boos

Ek verkies

Om nie hier vas te haak
Geklee of naak
My oë vestig op ‘n reis
Jesus het klaar betaal vir ‘n prys

©Jacques van Zyl 2019

Wat sê Isak:

Die afgelope paar weke worstel ek in myself omdat soos my geaardheid is, ek die wêreld graag self sou verander in plaas daarvan dat ek geduldig moet wees sodat elkeen om my net kan opvang. In ligte luim kan ek vertel dat die huis waar ek groot geword in Patiencestraat was, maar helaas ek het dit nie gesnap nie en is steeds redelik ongeduldig. Darem nie sodat ek aan padwoede toegee nie.

Ek het so paar programme op Kruiskyk oor ‘Breinkrag.’ gevolg. Dit is baie duidelik dat ons brein en denke ‘n enorme invloed het, nie net op ons self nie, maar ook die omgewing om ons en selfs die Heelal. Dit is egter ‘n veel groter onderwerp as om hier te bespreek. Jou brein is soos ‘n magneet en trek aan wat jy dink. Negatief na negatief en positief na positief. Dit is so geskep en so sal dit werk.

Ek sal kortliks ‘n paar aspekte noem:

Die Woord sê: “As a man thinketh in his heart, so is he!” My oorlede ma was verslaaf aan nuus. Dit was internasionale nuus, plaaslike nuus, streeknuus, kontreinuus, koerante, tydskrifte, sterre voorspel, you name it en sy het angsbevange geraak as sy iets gemis het. Nodeloos om te sê maar sy was omtrent ‘n wrak.

Onthou dat ons oë die vensters van ons siele is. Wat jy kyk, sien en lees rig jou gedagtes. Dis belangrik om te let daarop dat gedagtes word woorde, en woorde wek dade.

Die punt wat ek wil maak is dus dat as ons iets volg in die media, dan oordink ons dit en dan tree ons volgens ons verwysingsraamwerk op. As dit positief was affekteer dit ons liggaam, ons onmiddelike omgewing en uiteindelik die heelal, positief. Netso kring negatiewe goed ook uit tot daar ver en terug.

Hier is ‘n paar voorbeelde:

      ·       Ek het saam met Mnr De Beer gewerk. Hy was tweede senior in die stadsraad. Welaf. Hy het egter as ek hom sou groet en vra hoe dit gaan die ‘arm maar darem’ standaard geantwoord. Die gevolg was dat hy deurgaans sonder geld was en van die een benarde situasie na die ander gestruikelval het. Hy het arm in sy brein gestoor en dit aanhoudend bevestig deur sy mond..
·         Vanoggend in die apteek was daar ‘n dame wat baie warm en benoud gekry het. Sy het aanhoudend sweet afgevee. Opgekyk en genoem dat die lugreeling gehoor kan word maar dat dit nie afkoel nie. Skoonpa het verduidelik dat dit stukkend is en dat hulle besig is om dit reg te maak. Haar reaksie: “Alles in die land is stukkend.” Die arme dame het seker baie frustrsies want wat sy dink (en sê) sal en moet gebeur. Die Skrif sê: “What you say, is what you get.”

Ongelukkig is ons gedagtes en woorde soos ‘n klip uit ‘n kettie – dit kan nie terugkom of terug getrek word nie.

Nou hoe oorkom ons die penarie? Deur ons denke reg te programmer en dan reg te dink en reg te praat. Dis ‘n lang proses maar wanneer ons hard daaraan werk sal ons die resultate sien.


Sterkte julle, tot volgende week dan – onthou om awesome te wees.


ELAN GLOBAL RADIO
Die Stasie Vir Passievolle Mense
https://www.elanglobalradio.com
Lynelle Engelbrecht Clark: DIAMANT DIVAS. 
Die program vir die enkellopend waarin ons saam gesels oor al die slagysters, vrae, vrese en vreugdes van die enkel lopende.
WOENSDAG 9 JANUARIE 2019 at 10h00 SA Time
GESELS MET ONS:
Web: https://www.elanglobalradio.com/
Faceboek: Elan Global Radio Kuier en Klets
Twitter: Elan Global Radio
Instagram: elan_global_radio
WhatsApp: 066 305 3580
Gaan kuier en leer meer van ons, blogg saam en luister saam:
https://www.elanglobalradio.com/



Help an author/verleen hulp aan 'n skrywer

With only twelve days to go please consider donating towards my fundraiser. Your contribution will enable me to accomplish my dream. Om Am...