Vanuit my pen: Vind jy jou op Moedverloor se vlakte?

Jy gee jou beste.

Jy doen soms die onmoonlike.

Jy kyk verby jou eie tekortkominge en doen meer.

Maar ten spyte daarvan bly jy op die selfde plek. Soms wonder jy, “Moet ek dan perfek wees?”

“Wat verwag mense van my? Wat verwag God van my? Hoekom is dit ‘n konstante gesukkel?”

Is jou situasie van so ‘n aard dat jy eintlik nie weet hoe om daar uit te kom nie, ten spyte dat jy als moontlik doen? Jy soek werk heel moontlik. Jy bly op die uitkyk vir elke geleentheid moontlik om jou daaruit te kry. Jy lees soveel, leer soveel en hang aan. Soms net by jou vingerpunte. Als verniet.

Mense ondervind dit daagliks. Daardie gevoel van moedverlorenheid met geen lig in die donker tonnel nie.

Indien julle enigsins na my aard dan is dit ‘n konstante wonder, kommer en denke wat jou dag redelik vol kan maak. My soeke na finansiele stabiliteit is ‘n groot kommer in my lewe. Alhoewel ek besig is verander dit nie my finansiële situasie nie. Al wat dit veroorsaak is dat ek moeg word, in ‘n lae selfbeeld posisie in beweeg waar ek myself afbreek en dan is ek ook in rebellie oor my omstandighede. ‘n Nimmereindigende maalkolk van emosies soos twee pole wat teen mekaar veg vir aandag. Kan julle daarmee identifiseer?

Vir ander is dit dalk die haaglike omstandighede waarin hul leef, ‘n kind wat molestasie by die huis ervaar, ‘n vrou wat geslaan word totdat daar amper niks van haar oor is nie. ‘n Vrou wat permanent moet aanskou hoe haar man haar verneuk met elke rok wat verby kom. Alkolisme, dwelms, depressie - elkeen van hierdie handelinge laat ‘n streep van moedverlorenheid, verlorenheid agter. Nie net vir die persoon nie maar ook vir jou wat in noue verhouding is met hom/haar. Maak nie saak die omstandighede daardie gevoel van verlorenheid is alles oorweldigend. Jy dink niemand hoor jou nie. Niemand gee om nie.

Soms moet ons fisies uitgaan en praat tot iemand ons hoor. Dit is nie altyd so maklik nie. Maar daar is hulp. Ons moet net aanhou vra.

Ons gedagtes is ons grootste vyand, vernaam in die stilwees oomblikke moet jy waak daarteen en sorg dat dit nie te ver afwyk nie. Depressie ‘n lyn wat jy vinnig kan oortree in hierdie tyd. Die lyn tussen moedverloor en depressie so fyn dat jy soms nie besef jy lei aan depressie nie, as dit nie uitgewys word deur ‘n kundige nie.

Om van moedverloor se weegskaal te lig na ‘n positiewe uitkyk, verg tyd en baie geduld. Maar dit kan ook in ‘n dag oorwin word. Net jyself kan besluit hoe hierdie weegskaal sal lig. Positief of negatief. Daardie besluit verander jou denke en aksies. Soms het ons die ondersteuning van mense nodig om daaruit te kom. Soms net die gebaar van vriendelikheid, of ‘n kragtige aanhaling of Bybelvers. Tyd met die Here. Iets wat in jou gees resoneer en deur jou hele liggaam vibreer.

Nie almal van ons wil erken ons is op moedverloor se vlakte nie. Vrouens vernaam sal baie praat oor alle onderwerpe soos Kosmaak, kinders, of die tuin of hulself besig hou en daardie gevoel verdoesel met huiswerk en kinders. Hulle sal doen wat reg is ten koste van hulself. Tot eendag wanneer sy wakker skrik en besef dit was nog altyd daar.

Die onsienbare trane het altyd geval jy wou dit net nie erkenning gee nie.

Vanuit ‘n vrou se oogpunt is jou situasie baie keer in die hande van ander. Hetsy jou man, jou pa, familie, ‘n vriend. Omdat ons van nature aanvaar wil word en wil koester, en ja ook vir sekuriteit, bly ons waar ons is. In ruil daarvoor moet ons baie van onsself toesluit as te ware. Die rolle waarin jy beweeg laat jou nie toe om buite die boks te dink nie. Om die vrede te bewaar bly jy dan stil.

Al hierdie stil-bly-terug-staan-denke veroorsaak dan die meeste van die tyd die moed verlore gevoel. Vrae soos: ‘wanneer is dit my beurt?’ en, ‘wanneer is ek goed genoeg?’ of, “is dit al hoekom ek op hierdie aarde is?’ word dan ‘n gewig wat baie vroue in depressie dompel. Dit is asof, selfs in hierdie moderne tyd daar nogsteeds van ons verwag word om dieselfde te leef soos ons oumas of oumagrootjies lank voor ons. Tevrede met ons huis en dit wat daaruit spruit.

As jongmens was daar nie geleenthede vir my om verder te gaan studeer nie. Maak nie saak hoe graag ek wou nie, die fondse was net nie daar nie. Dwarsdeur my huwelik het ek gevra, gesmeek en gebid om ook te kon studeer maar die antwoord was altyd, nee. Fondse was altyd aangewend vir ander dinge maar nooit vir dit wat ek graag wou doen nie. Toe stap ek weg, in die hoop om my lewe te kan verander. Vyf jaar later is ek eintlik nog by dieselfde plek. Ongeag hoeveel keer ek probeer het om finansieël op my eie te staan kon ek dit nie reg kry nie. Ja, ek het baie geleer van myself maar my finansiële situasie is presies dieselfde.

Dit laat ‘n leemte in jou binneste. ‘n Gedagte dat jy nie goed genoeg is om ook op jou eie voete te staan nie. Dit is dan wat jy terug kyk en moedverloor se vlakte soos ‘n droë woestyn lyk met tussenposes van groen oases wat soos ‘n spieel verdwyn het.

Tog is daar vroue wat dit reg kry. Hulle maak dit in die wêreld en kan vir hulself sorg. ‘n Mens kyk op na hulle. Of jy nou hou van Oprah of nie, sy is ‘n goeie voorbeeld van ‘n vrou wat dit gemaak het.

Ons situasie in Suid Afrika maak dit ook nie maklik vir ons as vrou nie, of jy nou wit of ander kleurig is. Jy sukkel. Moedverloor is dan ‘n permanente stasie met ‘n permanente adres. Daar is selfs ‘n afdraai bord na die dorp Moedverloor in die Cedarberge. Die Google fotos wys die mooiste natuurskoon wat dit omring maar die naam is onteenseglik. Moedverloor. Onverandered gegiet op die landkaart, kompleet met bord en paaie. Net toereiklik deur bergsame en stofbelaaide paaie.

So, gaan ons ‘n bord opsit? Of gaan ons iets doen omtrent hierdie ‘plek’?

In my soeke na werk het ek op 16personalities.com se webwerf afgekom. Hier gee hulle jou ‘n toets om jou persoonlikheid te bepaal. Ek moet sê, ek was aangenaam verras met my uitslae.

Hulle kyk na elke area van jou lewe: Dit begin met ‘n Inleiding, Jou Sterk En Swak Punte, Romanse, Vriendskappe, Ouerskap, Beroep, Werksplek Optredes, En Sluit Af Met ‘N Geheel Beeld. Dit is natuurlik nie ‘n “exact science” nie maar jy kry ‘n baie goeie idee waar jy inpas in die groter prentjie. Die skakel is verkrygbaar op my blogpost. https://www.16personalities.com/ daar is ook geleentheid om die boek te koop wat jou meer detail gee asook ‘n kursus om jou unieke persoonlikheid verder te bestudeer.

Everything you do right now ripples outward and affects everyone. Your posture can shine your heart or transmit anxiety. Your breath can radiate love or muddy the room in depression. Your glance can awaken joy. Your words can inspire freedom. Your every act can open hearts and minds.

DAVID DEIDA

Wat sê die Bybel hieroor?

Psalm 38

7 Ek is krom, heeltemal geboë; die hele dag gaan ek Ps. 35:14in die rou;
8 want my lendene is vol ontsteking, en daar is geen heel plek in my vlees nie.
9 Ek is kragteloos en heeltemal verbrysel; ek Ps. 22:2brul van die gebons van my hart.
10 Here, voor U is al my begeertes, en my gesug is vir U nie verborge nie.
11 My hart slaan vinnig, my krag het my verlaat; en Ps. 6:8die lig van my oë, ook dit is nie by my nie.
12 Ps. 31:12; 88:19Die wat my liefhet en my vriende is, staan opsy vir my kwaal, en my nabestaandes Mt. 27:55; Mk. 15:40; Lk. 23:49het ver gaan staan;
13 en die wat my lewe soek, II Sam. 16:7,8span strikke; en die wat my ongeluk soek, spreek van ondergang, en hulle bedink die hele dag bedrog.
14 Maar ek is soos 'n dowe: ek hoor nie, en soos Ps. 39:3,10'n stomme wat sy mond nie oopmaak nie.
15 Ja, ek is soos 'n man wat nie hoor nie en in wie se mond geen Job 13:6teëspraak is nie;

David Wilkersen skryf die volgende oor die gedeelte

“Soos ek die psalm gelees het, kon ek my voorstel hoe Dawid in wanhoop ingesak het. Wat hom dalk die meeste gepla het was die feit dat hy nie kon verstaan waarom hy skielik so teneergedruk was nie. Hierdie man het na God gehunker, en sy hart daagliks in gebed voor God uitgestort. Hy het eerbied vir God se woord gehad, en psalms geskryf wat sy God verheerlik het. Maar nou, in sy depressiewe toestand, was al wat hy kon doen om uit te roep, "God, ek is aan die einde van myself. En ek het geen idée waarom dit gebeur nie!"

Soos baie moedelose Christene vandag, het Dawid probeer uitwerk waarom hy so leeg en gebroke gevoel het in sy gees. Hy het heel waarskynlik elke mislukking herleef, sonde en dwase daad wat hy ooit in sy lewe gedoen het. Op 'n sekere stadium moes hy dalk gedink het, "O, God, al my onverskillige dade het my so gewond gelaat dat daar geen hoop meer vir my is nie?" Op die ou end het Dawid geredeneer dat God besig is om hom te straf. Hy het uitgeroep, "O Here, straf my nie in u toorn nie en kasty my nie in u grimmigheid nie. Want u pyle het in my ingedring, en u hand het op my neergedaal. Daar is geen heel plek in my vlees vanweë u grimmigheid nie; daar is niks gesond in my gebeente vanweë my sonde nie. Want my ongeregtighede gaan oor my hoof; soos 'n swaar pak het hulle vir my te swaar geword" (vers 1-5).

Eenvoudig gestel, die gees van mismoedigheid is Satan se mees kragtigste wapen teen God se uitverkorenes. Die meeste van die tyd, gebruik hy dit om ons te oortuig dat ons God se toorn oor onsself gebring het deurdat ons nie aan Sy heilige standaarde voldoen het nie. Maar die apostel Paulus spoor ons aan om nie vir hierdie strik van satan te val nie: "want ons is met sy planne nie onbekend nie." (2 Korintiers 2:11).

Paulus sê, "U moet u moedeloosheid sien vir wat dit regtig is! Dit is 'n demoniese wapen - 'n pyl wat Satan afskiet vanuit sy pylkoker om u te kry om in uself te twyfel. Hy weet hy kan u nie versoek om van Jesus af weg te draai nie. Daarom oorweldig hy u met boosaardige leuens om u te laat dink dat u nooit goed genoeg sal wees om Christus te dien nie. Hy wil u so terneergedruk maak dat u die handdoek wil ingooi!"

Vra Uself Of Dawid Se Hartskreet Ook U Eie Kreet Is Wanneer U Ook Al Oorrompel Word Deur Die Gees Van Mismoedigheid Swakheid, seerheid, gebrokenheid, probleme, onrustigheid, rou - al hierdie dinge het Dawid se gees laag neer gebuig.

Hy het droog en leeg gevoel, sonder rigting, asof hy niks deur die jare geleer het nie. "en die lig van my oë, ook dit is nie by my nie." (Psalm 38:11). Dawid het eintlik gesê, "Ek het my geestelike insig verloor. My visie en openbaring van God het my verlaat. Ek kan God nie bereik soos ek dit altyd kon doen nie!"

Dit is die werk van Satan se gees van mismoedigheid. Dit maak van ons 'n teiken vir die kragte van die hel binne oomblikke van ons grootste geestelike oorwinning!

Die swaar, demoniese gees het Dawid so neergedruk, dat hy stom was in God se teenwoordigheid. Hy het gesê, "Maar ek is soos 'n dowe: ek hoor nie, en soos 'n stomme wat sy mond nie oop maak nie. Ja, ek is soos 'n man wat nie hoor nie en in wie se mond geen teëspraak is nie" (verse 14-15).

Die betekenis van die laaste gedeelte in Hebreeus is, "'n man het geen antwoorde of argumente oor nie." Dawid het gesê, "Here, ek is te teneergedruk en mismoedig om selfs my hand na U op te lig. Ek kan nie bid nie, want ek is te verward om te praat. Ek is gedreineer en leeg. Ek het niks om te sê nie."

God Sal Altyd Sag Wees Met Ons In Ons Hopelose Toestand - Maar Ons Mag Nooit Toelaat Dat Ongeloof 'n Plek In Ons Harte Kry Nie! Ons kan met God soveel as wat ons wil oor ons gevoelens van mislukking praat. Ons kan Hom vertel oor ons wanhoop oor ons sonde en ons dwase foute. Maar ons mag nooit gedagtes koester dat Hy ons verlaat het nie. Dit is 'n ernstige aantuiging, en ons Here neem dit nie ligtelik op nie. Ons sien Sy onmiddelike reaksie op sulke aantuigings in Numeri: "Toe trek hulle (Israel) van die berg Hor af weg op pad na die Skelfsee om die land Edom om te trek; maar die siel van die volk het op die pad ongeduldig geword. En die volk het teen God en teen Moses gespreek: Waarom het U ons uit Egipte laat optrek om in die woestyn te sterwe? Want daar is geen brood en geen water nie, en ons siel walg van die ellendige kos. Toe stuur die Here giftige slange onder die volk wat die volk gebyt het; en baie mense uit Israel het gesterwe" (Numeri 21:4-6).

Wanneer die Bybel my vertel dat my liefdevolle hemelse Vader, giftige slange gestuur het na sy eie mense, en dat hulle gesterf het van die slangbyte, kan ek nie die baie duidelike boodskap ignoreer nie. God sal nie sulke ongeloof toelaat onder Sy uitverkorenes nie! Na alles wat ons kosbare Here vir ons gedoen het, is die aantuiging dat Hy ons afskeep seker die een wat Hom die seerste kan maak. Ons moet versigtig wees vir sulke ongeloof, veral in ons moeilike tye.

Moenie Probeer Om Self Daaruit Te Kom Nie. Moenie probeer ontsnap deur u eie planne te maak nie. U is nie opgewasse teen die demoniese geeste wat teen u is nie. Die geveg is ver bo u menslike talente of fisiese krag. U kan dit ook nie met u vriende bespreek nie, of probeer om dit te oorwin deur boeke, seminare of beraders nie. Die konflik is in die geestelike sfeer, en u moet in die gees veg.

In sy tyd van mismoedigheid, kon Dawid nie uitwerk waarom hy so teneergedruk gevoel het nie. Hy het gevra, "Wat buig jy jou neer, o my siel, en is onrustig in my? Hoop op God; want ek sal Hom nog loof." (Psalm 42:6). Tog was sy vrae nie vertwyfelige oor God nie. Dawid begin die Psalm waar hy sy diepe hunkering na God uitdruk, "Soos 'n hert wat smag na waterstrome, so smag my siel na U, o God! My siel dors na God, na die lewende God; wanneer sal ek ingaan en voor die aangesig van God verskyn?" (verse 2-3).

In die middel van sy teleurstelling, het Dawid uitgeroep vir 'n openbaring van die Here. Hy het gesê, "God, daar was nog nooit 'n tyd waar ek U nie meer liefgehad het as nou nie. Ek dors na U soos die hert na water. Waarom is ek dan so mismoedig? Waarom ly ek onder sulke verskriklike teleurstellings?

Verseker het Dawid by tye wanhoop en depressie beleef as gevolg van sy sonde. Hy het die Here se kastyding verduur vir sy hoogmoed toe hy sy manne wat kan veg getel het, wat teen God se wet was. En hy het die pyn van God se stok gevoel toe hy owerspel met Batseba gepleeg het en gereël het dat haar man vermoor word. Sy hart het gebreek met neerslagtigheid oor die oordeel wat hy op sy familie gebring het, as gevolg van die sondes.

So is dit ook met baie gelowiges vandag, hulle is teneergedruk as gevolg van hulle sonde. Sommige is depressief omdat die Heilige Gees hulle in oorwinning wou inlei, maar hulle het dit teengestaan. Hulle het die weg van die vlees gekies, en dit lei altyd na pyn en teleurstelling.

As dit waar is van u, kan u daarvan seker wees dat u onder 'n aanslag is. Satan het 'n wolk van mismoedigheid gestuur om u te oorval. En hy het sy redes waarom hy dit doen!

U sien, mismoedigheid is die duiwel se mees verwoestende wapen in sy aanvalle op Gees-honger gelowiges. Dit was die vyand se beste wapen vir eeue teen God se uitverkorenes. En vanaf die dag dat u ernstig geword het oor die dinge van God - en vandat u in u hart die besluit gemaak het om Christus in Sy volheid te ken - het Satan daarna gesoek om u mismoedig te maak. Hy het gekyk hoedat u daagliks dieper in God se woord indelf. Hy het gesien hoe u verander, groei, en al die dinge van die wêreld oorwin. Dus het u 'n teiken vir hewige aanvalle gemaak. En u beter glo dat daardie aanval sal kom!

Nietemin as die aanval kom, moenie dink dat dit ongewoon is nie. God laat sulke vurige toetse toe met al sy gelowiges. Petrus skryf, "Geliefdes, verbaas julle nie oor die vuurgloed van vervolging onder julle wat tot julle beproewing dien, asof iets vreemds oor julle kom nie." (1 Petrus 4:12). Mismoedigheid is 'n toets wat God se mense al vir eeue moes verduur.

2. Gaan Na Gebed, Gee Die Heilige Gees Tyd Om Sy Werk Te Doen! Wanneer u onder die aanslag van die vyand se gees van mismoedigheid kom, sal u nie daarna voel om te bid nie. Maar u moet nog steeds na u binnekamer gaan en in Jesus se teenwoordigheid staan. U hoef nie daaroor bekommerd te wees oor hoe u kan probeer om u weg uit wanhoop uit kan bid nie. Dit is die tyd vir God se Gees om in u te werk. Dit is Sy werk om u uit die gat uit te lug!

As u na die Here gaan, wees eerlik met Hom. Vertel Hom hoe swak en hulpeloos u voel. Laat Hom weet, "Jesus, ek is droog. Ek het geen krag oor nie. As ek ooit uit die depressie gaan kom, gaan U dit moet laat gebeur".

In sulke af tye, is die Here baie geduldig met ons. Hy verwag nie van ons om dan hewige pogings van hewige ywer en inspanning in gebed aan te wend nie. Hy ken ons toestand, en Hy simpatiseer met ons. Sit in Sy teenwoordigheid en vertrou Sy Gees om in u te doen waarvoor Hy gestuur is. Dit maak nie saak hoe mismoedig u is nie - Hy sal u nooit in die steek laat nie!

Ons het die neiging om te dink elke keer as ons die Here faal, dat die Heilige Gees soos 'n voël wegvlieg. Sommige Puriteinse geestelikes het dit verkondig. Hulle het geglo dat God se Gees Christene vir 'n seisoen verlaat wanneer Hy deur hulle bedroef is.

Ek kon nog nooit die leerstelling verstaan of aanvaar nie. Hoe kan God se Gees my verlaat as ek Hom die nodigste het?

As Hy my verlaat wanneer ek faal en in diepe mismoedigheid inval, hoe kan hy dan my Trooster wees? Dit sal geen troos wees nie. Inteendeel dit sou my in satan se mag los!

Op dieselfde manier as die Heilige Gees my siel se heiligmaker is, hoe kan hy die werk doen, as Hy in en uit my lewe vlug elke keer as ek misluk? Hoe kan ek ooit my sonde sien sonder die Gees se teenwoordigheid in my om my te oortuig? Hoe kan ek weet hoe ek moet verander as Hy nie daar was om my te rig en te lei nie?

Jesus belowe ons, "En Ek sal die Vader bid, en Hy sal julle 'n ander Trooster gee om by julle te bly tot in ewigheid." "Ek sal julle nie as wese agterlaat nie; Ek kom weer na julle toe" (Joh 14:16,18).

Wanneer die duiwel se swaar gees van mismoedigheid oor u lewe sak, mag u dalk so radeloos voel dat u nie eers kan bid nie. Maar selfs as u nie 'n woord kan uitkry nie, kan u met Jesus praat in u gees. Sê saggies aan Hom, "Here, help my. Hierdie aanval is vir my te veel. Ek kan niks doen nie as om maar net hier te sit in geloof. Ek vertrou U Gees om dit uit my te dryf.

Die Eerste Ding Wat Die Heilige Gees Sal Doen Wanneer Hy Kom Is Om Al Satan Se Leuens Te Openbaar! "maar die Trooster, die Heilige Gees, wat die Vader in my Naam sal stuur, Hy sal julle alles leer en sal julle herinner aan alles wat Ek vir julle gesê het." Johannes 14:26.

Wanneer die duiwel met sy gees van swaarmoedigheid kom, bombardeer hy u met die een leuen na die ander. Hy vertel vir u leuens oor u huwelik, u familie, u vriendskappe, u roeping, u wandel met die Here. Dan begin hy om elke sonde, mislukking en dom ding wat u al ooit in u lewe gedoen het na u terug te bring. Teen die tyd dat hy met u klaar is, roep u uit, "O, God - ek sal dit nooit maak nie!"

Dit is presies wat die duiwel met my gedoen het. Terwyl ek gebid het, het ek sy aanvalle van helse leuens vir 'n half uur lank verduur. Dit was toe dat God se stil, sagte stem tot my gees deurgedring het. Hy het woorde vol liefde en deernis met my gepraat: "David, jy is geliefd. Moenie bekommerd wees nie - My hand is op jou. Jy staan onder 'n geweldige aanval, maar jy hoef nie te vrees nie. Jy het nie nou enige krag van jou eie nodig vir die geveg nie. Ek het alles wat jy nodig het.

Die eerste ding wat die Heilige Gees onder sulke omstandighede doen is dat hy u herinner aan die kosbare beloftes van Jesus. Dit het Hy ook vir my gedoen. Hy het my siel oorspoel met duisende beloftes wat ek van God se woord geken het. En Hy het my verseker, "Jou lewe is nog nie oor nie. Jy weet dit net nie, maar jy het eintlik nog nie eers daarmee begin nie. Die beste lê nog voor."

My gees het in my opgestyg. Toe ek daar opstaan het ek gedink, "Waarom het ek my ooit gesteur aan die mismoedigheid? Dit is nie van my Here nie!"

Dit is die werk van die Heilige Gees. Hy kanselleer die leuens van die vyand en bring vir ons bemoediging uit die hoogte.

Worldchallenge / Maroela Media / Vrouekeur

Die belangrikste is om nie daar te bly nie. Om die leuens raak te sien, en te oorwin deur die woord. Jou belydenis moet dan oorgaan in aksie. Deur jouself op te bou skep ‘n gevoel van prestasie wat jou op lig en heel moontlik deure oopmaak. Sodat jy sodoende ‘n vervulde lewe kan lei. Groot name is soms ook daar. Groot name het al die dood as uitweg gekies, en die wêreld in rou gelaat. Hoekom? Juis omdat hulle nog soveel gehad het om te gee.

Om saam te vat,

Erken die moedverloor gevoel. Deel dit hetsy met ‘n vertroueling, of in gebed en staan op! Deur op daardie plek te bly veroorsaak dat die tonnel net donkerder word. Selfmoord mag dalk dan na ‘n uitkoms lyk maar dit sal jou beroof van ‘n lewe gevul met moontlikhede. Kry hulp, indien moontlik. Reik uit. Moenie dat moedverloor ‘n permanente adres in jou kry nie. jy is meer as wat jy nou sien. Daar is ‘n uitweg. Moenie vashou aan leuens nie. ruk dit af en praat met iemand.

Die keuse is joune.

Skitter net waar jy is diamant, tot ‘n volgende keer. Mooi loop.