Diamant Divas Musiek program op Elan Global Radio

Goeie dag en welkom by Diamant Divas se program hier op Elan Global Radio. Vandag is net ‘n ontspanningsprogam gevul met musiek van luisteraars se keuses.

Die jaar is so te se op ‘n einde. ‘n Jaar wat gevul was met uitdagings, teleurstellings, keuses en vreugdes. Elkeen het sy merk gelaat maar die goeie nuus is ons is nog hier, nog ‘n jaar gespaar en ons kan die feesgety ingaan saam met familie en vriende in die wete dat dit goed gaan met ons siel.

Maar, voor ons kom by die musiek, wil ek net die stukkie voorlees ter aansluiting van Laasweek se program wat gehandel het oor depressie. Ek lees dit met die skrywers, Benescke Jansen van Rensburg se toestemming.

Moeg het die soldate terug by die kamp aangekom uit die oorlog. Die konflik in die gevegsone was intens. ’n Klomp soldate is ernstig gewond. “Luitenant,” het een van die troepe benoud gevra. “Ek vra toestemming om terug te keer na die gevegsone. My vriend is nie hier nie. Ek dink hy is gewond.” Die luitenant het geskok na die troep gekyk. Almal het geweet dat indien hy die versoek toestaan die troep sy eie lewe in gevaar sou stel. Hy het dus dadelik geweier. Die kanse was in elk geval goed dat die man se vriend reeds gesterf het.

In die hitte van die oomblik het die soldaat die bevel van die luitenant verontagsaam en terug na die gevegsone gehardloop. Oomblikke later was hy op pad terug met sy vriend se dooie liggaam in sy arms. In die proses is hy ook ernstig gewond.

Die offisier was woedend. “Ek het jou mos gesê jou vriend is dood. Nou is jy ook ernstig gewond!”  Toe die luitenant sien hoe ernstig die soldaat verwond is, het hy met deernis gevra: “Was dit darem die moeite werd om jou lewe te waag om jou vriend se liggaam uit te bring?” Die sterwende man het geglimlag: “Verseker, luitenant! Toe ek by my vriend kom het hy nog gelewe. Toe sê hy vir my: ‘Ek was seker jy sou kom!’”

God het aan ons die gawe van vriendskap gegee – met mense, maar ook met Hom. Die wete dat daar iemand is wat jou sal bystaan en jou help om jou las in moeilike tye te dra. In Johannes 15:13 sê Jesus: “Niemand het groter liefde as dit nie: dat hy sy lewe vir sy vriende aflê.” InPrediker 4:9 lees ons: “Twee vaar beter as een. Hulle inspanning kom tot iets. As die een val, kan die ander hom ophelp.” En in Spreuke 18:24 staan geskryf: “Daar is party vriende wat net praat maar wat niks help nie, maar 'n vriend kan vir jou meer lief wees as 'n broer.”

Watter tipe vriend of vriendin is jy vir ander mense? Iemand op wie ander kan staatmaak en steun? Of is jy net met mense vriende solank hulle iets vir jou kan beteken in die lewe? En hoe lyk jou vriendskap met God? Besef jy dat Hy ons in essensie geskep het om ’n vriendskapverhouding met Hom te bou?

My gebed is dat ons die vriende en vriendinne sal word vir ander wat ons graag in ons lewens begeer. Ook dat ons nie net ’n verhouding met God sal bou nie, maar ook ’n ware vriendskap! Hy het immers sy Seun gegee sodat ons nie verlore sal gaan nie, maar sodat ons weer met Hom versoen kan word! Mag ons dít nooit as vanselfsprekend aanvaar nie. Sterkte.

Vader God, baie dankie dat ons ’n vriendskap met U kan bou. Help my asseblief om te verstaan wat dit beteken. Lei my ook om ander te ondersteun en lief te hê soos wat U dit bestem het. Ek vra dit in die Naam van Jesus Christus. Amen.

In hierdie seisoen is dit so belangrik om nie ‘n broer of suster agter te laat nie. Dit is belangrik om mekaar in te trek en lief te he, net soos ons is. Moenie toelaat dat jou onvermoe om nie te verstaan nie ‘n wig plaas tussen jou en jou geliefdes nie. Saam kan ons die reuse van die wêreld aandurf en mekaar ondersteun.

Ons skop af met God keep my head above the water deur Avril Lavigne wat aangevra is deur Stienie Boshoff en baie gepas by die gebed van Benescke Janse van Rensburg. Daarna sal nog liedere volg, wat opgebreek sal word met advertensies.

Versoeke van Louis, Deon, Henlie, Lorna, Isak, Driekie, en Corrie en is ‘n lekker mengsel van geestelike, klassieke en ligte klanke.

Luister gerus saam en geniet die volgende paar minute.

ELAN GLOBAL RADIO
Die Stasie Vir Passievolle Mense
https://www.elanglobalradio.com

Lynelle Engelbrecht Clark: DIAMANT DIVAS. 
Die program vir die enkellopend waarin ons saam gesels oor al die slagysters, vrae, vrese en vreugdes van die enkel lopende.
WOENSDAG 19 DESEMBER 2018 at 10h00 SA Time

GESELS MET ONS:
Web: https://www.elanglobalradio.com/
Faceboek: Elan Global Radio Kuier en Klets
Twitter: Elan Global Radio
Instagram: elan_global_radio
WhatsApp: 066 305 3580
Gaan kuier en leer meer van ons, blogg saam en luister saam:
https://www.elanglobalradio.com/

SKAKEL IN:
SIMPLE RADIO App.
http://14123.live.streamtheworld.com/SAM04AAC125_SC
http://listen.samcloud.com/w/90758/EGR/?play=y#history
http://www.liveonlineradio.net/south-…/elan-global-radio.htm
http://radio.garden/live/centurion/elanglobal-radio/