Wednesday, September 12, 2018

Alweer alleen op 'n Saterdagaand?

Die afgelope paar maande het ek gesels oor enkellopendskap en hoe om dit te hanteer. Hoekom en waarom jy in jouself moet belê en te glo dat jy waardevol is. Jy moet besef dat hierdie nie die einde van die pad is nie maar juis die begin. Ek hoop dat julle daarby baat kon vind en dat ek op my beskeie manier iets kon oordra aan jou wat op hierdie enkelpad is. Als wat ek hier deel is wat ek ervaar het, my skruikelblokke en foute in die hoop dat jy hierdie tydperk beter keuses sal maak en rerig weer glo in jouself.
Maar nou wil ek ‘n bietjie stoute skoene aantrek en tyd spandeer aan die meer praktiese dinge. Die praktiese dinge mag dalk vir sommige nie aanvaarbaar wees nie maar dit is belangrik dat dit wel aangeraak word. Daar is te veel verhoudings en huwelike wat tot niet gaan omdat ons hierdie onderwerp vermy of systap. Mense glo om soos ‘n volstruis, jou kop in ‘n gat te druk, dat die probleem sal weggaan, wat ‘n mite is. Dit is juis ons stilstwye wat veroorsaak dat die probleem groter word. Ons as mens is geskape om te voel en te ervaar met hart en siel – nie net ons liggaam nie. Alles loop saam om ons volkome mens te maak. Nie een van ons het net sekere dele gekry nie. En ander verskillende dele nie. Ons het almal dieselfde mate gekry, man en vrou. Dit is ons benadering wat dit wel misvorm en lelik maak, wat die probleme veroorsaak.
Ek wil my die reg toeëien deur te sê: Deur alles om ons te vergeestelik verloor ons in baie gevalle ons senualiteit. Ons dink as ons christelik optree of dit ignoreer, sal die drange waarmee ons gebore is, verdwyn. Maar dit is juis ons stilswye wat dit vererger. Hierdie aspek is onlosmaaklik deel van ons menswees.
Ek beweeg daagliks tussen verskillende skrywersgroepe ... wat bestaan uit mans en vrouens ... en uit hul skryfwerk kan jy sien hoe diep gewortel is ons sensuele faset. Dit kom altyd na vore en is baie mooi en smaakvol gedoen.

Vrou duisend 

As ek duisend sterre pluk
en in jou hare rangskik
is dit steeds een te min
en is dit slegs die begin
Wanneer ek honderde volmane
gaan haal om aan jou hals te hang
bly dit steeds 'n leë gebaar
vir 'n man wat nie goed vaar
jy is nie my enigste keuse nie
maar tog nie my laaste keuse nie
jy, my beminde, is 'n koningin
oor honderde vroue
Jy staan nie uit nie
jy skitter uit
Jy is die vrou van harte.
Kopiereg Douwlina du Plessis



In die boek Hooglied het Salamo die volgende geskryf:
Hoofstuk 4 “Kyk! Jy is pragtig, o my vriendin. Kyk! Jy is pragtig. Jou oë is soos dié van duiwe, agter jou sluier. Jou hare is soos ’n trop bokke wat afgehuppel het uit die bergstreek van Giʹlead.  Jou tande is soos ’n trop pas geskeerde ooie wat van die wasplek af opgekom het, wat almal tweelinge voortbring, terwyl nie een van hulle hulle lammers verloor het nie.  Jou lippe is soos ’n skarlaken draad, en jou spraak is aangenaam. Jou slape is soos ’n granaatskyf agter jou sluier.  Jou nek is soos die toring van Dawid, gebou in kliplae, waaraan duisend skilde hang, al die ronde skilde van die sterk manne.  Jou twee borste is soos twee lammers, die tweeling van ’n gaselooi, wat tussen die lelies wei.”  “Totdat die wind saggies waai en die skaduwees gevlug het, sal ek na die mirreberg en na die wierookheuwel gaan.”  “Jy is in alle opsigte pragtig, o my vriendin, en jy is sonder gebrek.  Kom saam met my van die Liʹbanon af, o bruid, kom saam met my van die Liʹbanon af. Daal af van die top van die Anti-Liʹbanon, van die top van Senir, ja, Hermon, van die lêplekke van die leeus, van die berge van die luiperds.  Jy het my hart laat klop, o my suster, my bruid, jy het my hart laat klop deur een van jou oë, deur een hangertjie van jou halssieraad. 10  Hoe pragtig is jou liefdesblyke, o my suster, my bruid! Hoeveel beter is jou liefdesblyke as wyn en die geur van jou olies as allerhande parfuums! 11  Jou lippe bly drup van heuningstroop, o my bruid. Heuning en melk is onder jou tong, en die geur van jou klere is soos die geur van die Liʹbanon. 12  ’n Geslote tuin is my suster, my bruid, ’n geslote tuin, ’n verseëlde fontein. 13  Jou vel is ’n paradys van granate, met die keurigste vrugte, hennaplante saam met nardusplante; 14  nardus en saffraan, geurige riet en kaneel, saam met allerhande wierookbome, mirre en aalwyne, saam met al die beste parfuums; 15  en ’n fontein van die tuine, ’n put met vars water, en stroompies van die Liʹbanon af. 16  Word wakker, o noordewind, en kom in, o suidewind. Waai oor my tuin. Laat sy geure uitvloei.”“Laat my beminde in sy tuin kom en die keurigste vrugte daarvan eet.”

Salomo besing die vrou van kop tot tone en mis niks in sy beskrywing nie. Die verhouding tussen man en vrou is meer as net seks. Dit is kompleks, passievol, vol afwagting, verdraagsaam, liefdevol, geduldig.
Dit is ‘n verhouding wat jy nie deel met iemand anders nie en niemand anders kan deel word van hierdie spesiale band nie. Dit is enigsoortig, en vervullend. Ongelukkig, met al die pornografie en verwarring daar buite het die siening verander van iets moois na iets veragtelik. Daarom is dit belangrik dat ons God se beeld vir ons moet kry en nie die verwronge beeld van die mens nie.
Vir die vrou is sensualiteit meer as net die fisiese. Dit is te bespeur in haar optrede, aantrek en selfs haar selfvertroue. Vir die man gaan dit oor die uiterlike meerendeel en mis hulle baie keer die siels-sensualiteit wat ‘n vrou besonders maak. Daarom kry jy baie mans – wat met ‘n vrou kan slaap en wegstap, ongeskonde.  Die hart, emosies en siel het niks met dit uit te waai nie. Dit gaan net oor die tydelike plesier en vervulling.
Ongelukkig is dit waar die meeste vrouens seerkry omdat hulle nie geleer het om te onderskei nie. Nou is jy op hierdie nuwe pad en jy het ‘n geleentheid om dit reg te doen hierdie keer; en nie weer te val vir slim stories nie. Jy het nou geleer – ek hoop so- en is gereed om aan te beweeg en iemand wat jou sal aanvul op elke gebied te ontmoet en die beste weergawe van jouself te wees. Daar is manne wat in meer as net die uiterlike belangstel, yl gesaai maar daar. Die res is vlietend van aard en gaan eintlik jou tyd en energie mors. Behalwe as jy oop is vir sulke dinge en ook geen verbintenisse wil hê nie maar wees gewaarsku jy gaan jou vingers verbrand.

Jy is nou al ‘n paar maande alleen, jy het nog heelwat probleme veral op die finasiële kant en sukkel om kop bo water te hou. Kinders is besig of kuier by maats of is by hul pa vir die naweek. Jy is nie lus vir ouers, kinders of vriende nie. Jy soek geselskap en is heel moontlik nog rou of kwesbaar. Jy is lus om te kuier en jou voete jeuk maar voel nog selfbewus, hoe nou gemaak?
Nie almal hou daarvan om alleen uit te gaan nie. Jy het dalk in elk geval nie geld om uit te gaan nie. Maar voel tog jy moet uitkom en nuwe mense ontmoet en net een aand vergeet van jou bekommernisse. Jy wil soos ‘n vrou voel. Begeerlik en mooi. Maar waar begin jy, vernaamlik as jy nie ander enkellopendes ken nie? Jou getroude vriendinne sien jou skielik as ‘n bedreiging en sommige getroude mans dink jy is oop vir enige iets net om ook bevrediging te kry.
Indien jy nie stokperdjies het nie is dit juis nou die beste tyd om een te kry en aan te sluit by iets waarby jy aanklank sal vind. So verbreed jy jou wêreld.
Jy kan ook die internet probeer maar wees gewaarsku daar is baie strikke en slaggate.
Jou status op bakkiesblad het van getroud na geskei of enkellopend verander en goedbedoelende mense voeg jou by enkellopende groepe. Daar deel hulle grappies, kuier of gesels oor ernstiger dinge. Als, sodat jy weer jou voete kan vind en miskien die ridder op die wit perd kan ontmoet ... jy weet, hoekie vir eensames scenario.
Skielik begin wildvreemde mans vir jou vriendskapsversoeke stuur. Party lyk heel skaflik en jy gesels lekker met hulle. Met ander wonder jy wat het die kat nou hier aangedra. Party is heel onskuldig en eintlik vervelig. Skuus vir die vereenvoudiging...maar rerig ouens, ons vroue wil nie met ‘n man gesels wat dink die hoogtepunt van sy bestaan is die nuwe kanaal op TV nie. Nee gonna jong, doen iets! LOL
Maar dan is daar die wolwe wat teer op vrouens soos ek en jy. Hulle is meer vrypostig en is sommer dadelik onder die rok in. Ander dink sommer jy en hy is nou ‘n item by geselsie nommer twee en is jaloers as jy iemand se plasing met ‘n duimpie versier. Ons mensdom is partykeer tog so oorsensitief. Ander vra om met jou te trou die oomblik wat jy groet. En dan moet ons nie van die outjies vergeet wat op soek is na ‘n cougar nie. Jip, feite. Openlik sal die kinders jou benader met snaakse idees wat my soms laat rol het van die lag. Dit is asof die jongmans dink dit is ‘n status simbool of moers romanties om met ouer vroue uit te gaan. Julle moenie lag nie...  die goed gebeur regtig.
Dan kry jy die anderkleuriges wat dink ‘n witvrou is die vangs. Dit is iets wat jy moet uitmaak met jouself maar as reël het ek hulle nooit aanvaar op my blad nie.
Jy kan hierdie benaderings op twee maniere hanteer. Afhangende van jou oortuigings.
Die promiskieuse aanslag of die kluisenaars stereotipe. In albei gevalle is daar gevare. Elkeen van ons hou van verskillende dinge of verskillende aktiewiteite. Sommige vroue hou van uitgaan en besoek kroeë, sosiale geleenthede of dansplekke. Die ander vrou sal liewer alleen by die huis bly, nêrens heen gaan nie en kla dat sy alleen is. Maar agv haar sienings wil mans nie met haar uitgaan nie.
Daar is heelwat vrouens wat koud is agv verkragting, molestering of aanranding. Of glo, agv ‘n ma of ouma se invloed dat seks vuil en goedkoop is. Ek sou aanbeveel dat jy regtig met ‘n berader oor hierdie dinge sal gesels. Op die ou einde sal jy jouself ‘n groot guns bewys deur genesing en bevryding te ontvang.



a)      Die promiskieuse aanslag:
Jy is redelik uitgehonger vir grootmens geselskap teen die tyd so aanvaar die meer onder die belt geselskap bloot net om nie alleen te voel nie. Die gesprekke wissel van seksueel na ernstiger onderwerpe. Die seksuele bring dadelik skeidsmure af sodat mense mekaar op ‘n baie beter vlak leer ken. Maar ‘n woord van waarskuwing. Onthou, FB is ‘n sosiale netwerk, maak dit sommer baie vinnig duidelik dat jy geen fotos sal deel nie. Ek glo dat ‘n mens oor die seksuele kan gesels sonder om goed te stuur waaroor jy later spyt kan wees. Wanneer jy jouself so oop maak kan jy vir jouself probleme op die hals haal. Onthou, jy ken nie die persoon aan die ander kant nie so jy weet nie wat is rerig sy intensies nie. Sosiale netwerke veroorsaak dat baie mense – mans en vrouens – skuilblaaie het. Gewoonlik vind jy dit eers uit wanneer dit te laat is maar hier is ‘n paar punte waarop jy bedag moet wees.

#1 Geen persoonlike inligting is op hierdie blad nie.
#2 Die status van die persoon is onbekend.
#3 Indien nommers of epos adresse uitgedeel word is dit gewoonlik nie die regtes nie.
#4 Hulle is net sekere tye op die Internet beskikbaar.
#5 Is onbereikbaar.
#6 Gee nooit regte ouderdom nie
#7 Het geen persoonlike fotos op hierdie blad nie.

Wanneer jy met hierdie mense praat moet jy weet dat daar niks van hierdie tipe gesprekke gaan kom nie. So dit is belangrik om nie jou gevoelens hier ‘n rol te laat speel nie. Dit is een ding om te gesels maar heeltemal ‘n ander wanneer jou hart en emosies begin betrokke raak. Wees waaksaam. Doen jou huiswerk deur rond te gaan krap op die persoon se blad veral by die “about” afdeling. Vra vrae. Indien jy enigsins twyfel vertrou jou gut en stap weg. Dit wat jy van die persone leer is net oppervlakig en jy kan nie rerig waarde daaraan heg nie. Op die ou einde is hierdie tipe van blaaie baie onpersoonlik en kruip heel moontlik weg vir die vrou. Jy is ook nie die enigste persoon met wie hulle gesels nie. Moet dit nooit uit die oog verloor nie. 

Moenie dat jou alleenheid jou laat glo hulle is opreg nie, want hulle is nie. Dit is baie selde wat jy rerig ‘n konneksie het met iemand van die teenoorgestelde geslag in hierdie tipe van opset.
Daar is baie slaggate waarop jy bedag moet wees. So moenie die eerste die beste uitnodiging aanvaar en dink nou is jou alleenpad op ‘n einde nie.

In twee gevalle het ek eers agterna besef die mans was nie wie hulle voorgegee het nie. Ek het op die harde manier geleer. Die een was baie vermakerig oor die feit dat hy my so ‘n goeie rat voor die oë gedraai het. Ek het vernederd gevoel maar redelik skotvry daarvan afgekom. Die tweede man het my laat glo dat hy ernstig was, dat hy en sy vrou besig was om te skei. Die eerste aand wat ons ontmoet, het ek vir die eerste keer sy regte naam gehoor. Dit nadat ons alreeds twee maande op messenger gesels het. Ek moes toe weggestap het, maar dwaas wat ek was, het ek die stories geglo en baie duur lesse daaruit geleer. Op die ou einde was ek behandel soos ‘n goedkoop vrou wat nie goed genoeg was vir hom nie. Dit het my lank gevat om oor die seer en vernedering te kom.

Dit is hoe naïef ek was. Ek wens ek het iemand gehad wat my vooraf ingelig het dan het ek die helfte minder foute gemaak.



b)      Die kluisenaars stereotipe:

‘n Man, wat op die oog af netjies lyk stuur vir jou ‘n foto  - dit kan verskeie goed wees. Of sy geslagsdeel, of seksposisie met die vraag wat verkies jy of ‘n vrou in sjokolade omhul, blomme... wel jy kry die idee. Jy raak op die plek smoorkwaad en plaas ‘n boodskap op jou blad en die groepe van hoe siek die mans is en gooi al jou speelgoed uit die kot uit. Jy vertel hulle in geen onduidelik taal dat jy ‘n christen vrou is wat nie sulke gedrag sal verdra nie. Jy maak dit baie duidelik dat jy nie glo aan buite-egtelike seks nie. Jy verklaar eintlik oorlog teenoor al wat man is en blok almal voor die voet.
Met jou volgende plasing kla jy dat jy eensaam is en wonder wanneer meneer reg dan nou gaan opdaag.
Ek het nuus vir jou – en sommige vroue mag my dalk stenig hieroor -  maar voordat jy die eerste klip optel, luister.
Jy is nie meer ‘n maagd nie. Deur jouself soos ‘n non te gedra gaan jy die teenoorgestelde uitwerking hê. Jy gaan op die rak sit, gefrustreed en alleen.
Ek glo elke vrou se sensualiteit kan met die regte man se aanraking ontbloot word. Dit kos ‘n spesiale man soos Salomo om dit in jou te ontdek maar dan moet jy bereid wees om oop te maak. Toe te laat dat die persoon jou vlei – manne, vlei beteken nie sy wil Jakob regop sien nie. Dit is nie vlei nie maar vernederend.

Ek sê nie word promiskieus nie maar gee jouself die geleentheid om vrou te wees. Indien jy sinnigheid het in ‘n spesifieke man leer hom ken sonder om hom te stalk op FB. So begin jy mense te leer ken en in ruil leer hulle jou ken. Jy gedy heeltemal en word mooier as mooi. Wees selektief in jou benadering en bly oopkop.

Oorgeestelikheid maak vrouens koud, nie meer geestelik nie. Dit is ‘n leuen wat al solank in die kerk se binnekringe heers dat baie glo seks is vuil of die naakte liggaam is lelik en net daar vir teling. Ons is nie diere nie, ons teel nie. Ons is ook nie robotte nie. Ons is warmbloedige wesens wat die lewe deur ons are wil voel bruis. Vir lank was ons vasgevang daarin en mans – wat dinge fisies ervaar – loop dan rond, want hulle soek ‘n uitlaatklep. Maar dan moet ek ook noem dat manne, sorg dat julle skoon is. Vrouens hou van ‘n skoon man, skeer gereeld, bad gereeld...genade man, maak ‘n plan as jy haar rerig lief het. Ipv om te kla by ander vrouens dat jou vrou koud is. Met dit sê ek nie rondslaap is reg nie, allermins. Maar is dit nie tyd dat ons kyk na ons houdings rondom ons Godgegewe gawe nie en hom toelaat om dit te geniet nie? Is dit nie tyd om nou jou siening te verander nie? Heel moontlik was dit juis die oorsaak van jou mislukte huwelik of verhouding.

Ek het met heelwat getroude mans gesels in daardie tydperk, wat dit al erken het. “As my vrou net meer wil gee, as sy my net wil toelaat om haar te geniet ens, sal ek bly. Ek wil haar nie skei nie, ek is lief vir haar maar ek het nodig om nie altyd te voel ek is besig om die ergste sonde te pleeg nie.” En ek stem saam met hulle. Om seksueel te verkeer is die grootste vorm van waardering. Dit is tasbaar en eiesoortig en iets wat jy net met daardie een persoon sal ervaar. Wanneer jy jouself weerhou en nie oorgee nie beroof jy nie net jou man nie maar ook jouself van ‘n diep konneksie waarna jou siel hunker.  

Oorgeestelikheid kan dan ‘n sonde word. Deur onsself te weerhou van ons mans af maak ons juis die deur oop vir ‘n verhouding. Dit is feite. Dit help nie ons skerm om dit nie. En verstaan my mooi, daarmee sê ek nie affairs en rondslapery is reg nie. Maar voor ons die vinger wys moet ons seker maak dat ons als gedoen het om ons huwelik te red en dat ons kant skoon is. Dit help nie ons verwag dat hy sy kop moet skoon kry maar jy leef nogsteeds met dieselfde leuen nie.

Ek lees graag nog ‘n gedig voor van Velma Barnard met haar toestemming.

Mannin

sy is alter-ego van adam die man
en halveer in alphasel van mensdom se ontkiem
sy dra vrugbeginsel vanwaar nuwe lewe lig sien
haar liggaam is geoffer as inkubasiestasie
om daardeur as ontwerp van wonderwerk te dien
daarin lê die grootste seën wat oor haar reën
ingebore instink tot koestering en teerheid
maak haar beminlikheid soveel meer
waar sy waak en veg vir haar geliefdes om haar,
wentelas elke huislike ekosisteem
hou jy haar gelukkig is die atmosfeer idillies
totale blis sal vloei waar vrede heers en liefde is
haar versugting en smagting is na vertroue
dat haar lewensmaat se oë haar hart sal weerkaats
wanneer sy passievol nader om tot smeltpunt te vlam
hou dus fyn dop sielsmaat, om haar hart se punt te raak
gaan jy jou soetste nektar bymekaar moet maak
dis in opregtheid wat jou tong, nektar se terugvloei sal smaak
sy heet Eva verbrou, die swakke vrou
maar tog neem dit twee om te trou en te bou aan behou
juis daar waar dans herhalend saamsluk en swaardra
aan die sakke sout, vrylik sonder voorbehoud
Mannin is die term van haar definisie
en lewe die ontginningsproses van haar omskrywing
lojaliteit is daardie flits waar beide komponente een is
© Vellies J Barnard
08/08/2014

Ons vel is die grootste bron van ons seksualiteit. Die oomblik wat iemand aan jou raak veroorsaak dit prikkelings regoor jou lyf, al was dit net jou hand. En wanneer jou emosies ook betrokke is, is dit net so goed soos ‘n weerligstraal wat jou elektrifiseer en slaan jy uit in goosebumps. Wanneer jou geliefde aan jou vat doen dit iets aan jou. Jy is meer bewus van die ander persoon. Jou reuksintuie tree in, jou ore verskerp en jy het skielik ‘n sesde sintuig wat ingefokus is op jou maat. Dit is dan wanneer julle op dieselfde tyd begin praat of presies weet wat hy dink. En dit net bloot omdat julle mekaar aanraak. Dit is nie net sensueel nie maar ook genesend van aard. Daar is baie paartjies wat nooit aan mekaar raak nie en hul verhouding is koud en onpersoonlik. Hulle is bloot net bymekaar uit gewoonte en dit is glad nie goed nie.
Geniet daardie aanraking, al is dit hoe lig want dit beteken julle gee om.

Dan het ons borste, en suid van die borste het ons ‘n vagina. Met ‘n rede. Dit is nie die nether regions nie. En ons raak net daaraan tydens ons bad-episode nie. Nee, dit het ‘n naam gekry. En dit doen meer as net water afslaan en kinders baar.

Liewe vrou, jy is spesiaal geskep en mooi in God se oë. Wanneer laas het jy jouself in die spieël bekyk, naak? Sonder klere aan? Daar is niks vuil of sleg aan jou nie. Jou liggaam is gemaak vir die man se genietinge en sy liggaam is gemaak vir joune. Die Bybel is baie duidelik daaroor. Moenie jouself weerhou van jou man nie behalwe wanneer daar gesamentlik ooreengestem is of julle vas. God het ons juis gemaak om mekaar se liggame lief te hê en te geniet. Wanneer jy jouself in ‘n godsdienstige kleed sit dan ontneem jou jouself van daardie deel wat jou juis laat skitter.

Met dit alles gesê, hoe gaan jy die dating scene betree? Nogsteeds met dieselfde leuens van vroeer of gaan jy toelaat dat iemand jou leer hoe om te ontwaak?

Om die buitewêreld alleen te betree vat baie waagmoed. Dit is nie maklik nie en die meeste van die tyd gaan jy alleen voel te midde van mense om jou. Watter plekke is toelaatbaar vir jou as vrou om alleen op te daag en gemaklik te voel?
Ek dink dit hang van’n vrou se persoonlikheid af.
Daar is sommige pubs waar jy heel gemaklik kan sit, ‘n bord kos kan geniet, miskien ‘n drankie drink en wegstap, ongeskonde. Dan is daar kroeë waar jy sommer met die intrapslag vuil voel. Bly weg van sulke plekke af. ‘n Vriendin van my het gereeld saam met vriende gaan dans. Sy het altyd gesorg dat sy saam met hulle uitgaan en terselfdertyd so geleer om te dans en die lewe te geniet. Op die ou einde het sy daar ‘n netjiese man ontmoet en is hulle nou gelukkig saam.
Daar is ook ander groepe wat jy by kan aansluit. Dit hang af wat is jou belangstellings. Kerkgroepe is natuurlik ook ‘n goeie plek maar wees maar bedag vir die wolwe in skaapksklere. Nie almal wat daar is se attensies is goed nie.

Die groot ding van hierdie gesprek is wees bedag op wat buite aangaan, en moenie toelaat dat jou eie vrese jou weerhou van ‘n sinvolle verhouding nie. Hierdie keer kan jy dit anders doen deur oopkop te bly.

Tot ‘n volgende keer

Skitter net waar jy is diamant. 


ELAN GLOBAL RADIO
Die Stasie Vir Passievolle Mense
https://www.elanglobalradio.com
Lynelle Clark: Diamant Diva's
WOENSDAG 10h00 SA Time
Vandag se program handel oor Vrouwees, lees ook n paar gedigte voor skakel gerus in.
Velma J Barnard Douwlina Du Plessis
GESELS MET ONS:
Web: https://www.elanglobalradio.com
Faceboek: Elan Global Radio Kuier en Klets
Twitter: Elan Global Radio
Instagram: elan_global_radio
WhatsApp: 066 305 3580
Gaan kuier en leer meer van ons, blogg saam en luister saam:
https://www.elanglobalradio.com
SKAKEL IN:
SIMPLE RADIO App.
http://14123.live.streamtheworld.com/SAM04AAC125_SC
http://listen.samcloud.com/w/90758/EGR/?play=y#history
http://www.liveonlineradio.net/south-
…/elan-global-radio.htm

No comments:

Post a Comment

Die onmoontlike het gebeur, ‘n man stel belang, wil jou ken, en tyd met jou spandeer.

Vandag se program is tweedoelig van aard; waar ek met mans en vrouens wil gesels. Verhoudings is nie maklik nie en elke stap in die ...